Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 314 Hüküm no: 324 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Şaban b. Hüseyin’in terekesinin vasîsi Ömer’in hesaplarını kontrol için Osman Halife b. Ali’nin hasbî nâzır tayini Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de hâlâ beytülmâl emîni olup muhallefât-ı câ’i’z-zikre vâzı‘ü’l-yed olan Ahmed Çelebi b. Mehmed mahfil-i kazâda medîne-i mezbûre mahallâtından Davud Ağa mahallesinde sâkin Ömer Bey b. Şaban mahzarında üzerine bi’l-emâne takrîr-i da‘vâ edip bundan akdem mezkûr Ömer Bey yanında mütemekkin iken fevt olup zâhirde vâris-i ma‘rûf ve ma‘rûfesi olmamağla muhallefâtı taraf-ı vakfa âid olan Şaban b. Hüseyin nâm müteveffânın muhallefâtından üç bin nakd-i râyic fi’l-vakt akçe mezbûr Ömer Bey ahz ü kabz ve bir mikdârını techîz [ve] tekfînine harc ve sarf edip mâ‘adâsını vakıf için emânetim hasebiyle mezbûr Ömer Bey’den taleb eylediğimde teslîmden imtinâ‘ eder hâlâ suâl olunup alıverilmek matlûbumdur dedikde gıbbe’s-suâl mezbûr Ömer Bey cevâbında müteveffâ-yı mezbûr vaktâ ki maraz-ı mevt ile marîz olduysa meblağ-ı mezbûru malından ihrâc ve huzûr-ı müslimînde meblağ-ı mezbûr techîz ve tekfîn ve eyyâm-ı mu‘tâdda tabh-ı ta‘âm ve sâir malzeme için harc ve sarf olunmak üzre vasiyyet edip tenfîz-i vesâyet-i mezbûre için beni vasiyy-i muhtâr nasb ve ta‘yîn etmeğin ben dahi vesâyet-i mezkûreyi kabûl ve meblağ-ı mezbûru kabz edip merkūm Şaban vasiyyet-i mezbûre [üzre] musırran fevt olmağla mezbûrun bir mikdârını ta‘yîn eylediği üzre techîz ve tekfînine harc ve sarf eyledim mâ bakiyyeyi dahi tamâm olunca harc eyledim deyicek isre’l-istintâk ve’l-inkâr ve akībe’l-istişhâd udûl-i ricâlden fahrü’l-eimme Hasan Efendi b. Hüseyin ve Nasuh Halîfe b. Abdüsselâm li ecli’ş-şehâde makām-ı kazâya hâzırân olup istişhâd olunduklarında, fi’l-hakīka müteveffâ-yı mezbûr maraz-ı mevtinde malından mârrü’z-zikr üç bin akçeyi bizim huzûrumuzda ihrâc ve techîz ve tekfînine ve eyyâm-ı mu‘tâdda tabh-ı ta‘âma harc ve sarf olunmak üzre ta‘yîn ve müsteşhid-i mezbûru vasiyy-i muhtâr nasb ve ta‘yîn ve meblağ-ı mezbûru yedine def‘ u teslîm, ol dahi vesâyet-i mezbûreyi kabûl ve meblağ-ı mezbûru kabz edip müteveffâ-yı mezbûr vasiyyet-i mezkûre üzre musırran fevt olmuşdur. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm muvakki‘-i sadr-ı kitâb olan hâkim-i hâsim hazretleri Osman Halîfe b. Ali nâm kimesneyi vasiyy-i mezbûr üzerine hasbî nâzır nasb ve ta‘yîn etmeğin ol dahi kabûl ve edâya müte‘ahhid olmağın mâ cerâ kayd şüd. Fi’l-yevmi’l-hâdî aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Efendi b. Hüseyin Vakkas, Hamza Efendi el-Kadı, Ahmed b. Mustafa, el-Hâc Hasan b. Mustafa ve gayruhüm mine’l-hâzırîn.