Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 315 Hüküm no: 325 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağazâde Mehmed Ağa’nın borcuna karşılık evini Ümmühâni bt. Abdülmennân’a rehin vermesi Havâss-ı Kostantıniyye kazâsı a‘mâlinden Çatalca nâhiyesine tâbi‘ Şeyh Sinan nâm karyede sâkin fahrü’l-e‘âlî ve’l-e‘âzim Osman Ağazâde Mehmed Ağa meclis-i şer‘de medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Kasım Paşa mahallesinde sâkine fahrü’l-muhadderât Ümmühâni bt. Abdülmennân nâm hâtun kıbelinden ikrâr-ı âti’z-zikri tasdîke vekîl olup bimâ hüve tarîki’s-sübût şer‘an vekâleti sâbite olan zevci ve kendinin kayını umdetü’l-kuzât zübdetü’l-vülât Ağazâde Mehmed Efendi b. el-merhûm Nasuh Ağa mahzarında ikrâr ve takrîr-i kelâm edip kayınım vekîl-i mezbûr Mehmed Efendi’nin halîlesi mûmâ-ileyhâ Ümmühâni Hâtun’dan on bin fıddî nakd-i râyic fi’l-vakt akçe istikrâz ve kabûl eylediğimde ol dahi ber minvâl-i muharrer ikrâz ve teslîm etmeğin ben dahi meblağ-ı mezbûr mukābelesinde silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Mehmed Çelebi ve Ahmed Efendi oğulları bağları ve bir tarafdan hemşîrem Fâtıma Hâtun bağı ve iki tarafdan mer‘â ve tarîk-i âm ile mahdûd zât-ı eşcâr-ı müsmire ve gayr-ı müsmireyi müştemil bir kıt‘a mülk bağımı müvekkil-i mûmâ-ileyhâ yedine rehn-i makbûz vaz‘ ve teslîm eylediğimde ol dahi minvâl-i muharrer üzre irtihân ve ve tesellüm ve kabz ve kabûl eyledi inşâ’allâhü te‘âlâ zikr olunan on bin akçeyi müvekkile-i mûmâ-ileyhâya edâ ve teslîm eylediğimde fekk-i rehin oluna dedikde mukırr-ı mezbûru kelimât-ı meşrûhunda vekîl-i mezbûr vekâleten bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ kayd şüd. Fi’l-yevmi’r-râbi‘ aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Şaban Çelebi b. Hüseyin el-Müderris, Ali Çelebi b. Mahmud el-Attâr, Mehmed b. Musli, Mustafa b. Abdullah ve gayruhüm mine’l-hâzırîn.