Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 316 Hüküm no: 326 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mahmud Ağa’nın Yassıviran’daki çiftliğini yeniçeri başhalifesi Abdüllatif Efendi’ye satıp tarla ve çayırlarının kullanım hakkını devretmesi Yâ Fettâh Dârü’s-saltanati’s-seniyye Kostantıniyye el-mahmiyye’de Ali Paşa semtinde Altıay çeşmesi kurbunda Debbâğzâde mahallesi sükkânından umdetü’l-emâcid ve’l-eşbâh el-Hâc Mahmud Ağa b. Mehmed meclis-i şer‘-i şerîf-i şâmihü’l-imâdda ve mahfil-i dîn-i münîf-i râsihü’l-evtâdda, Dergâh-ı âlî -dâme mahfûfen bi’l-avni’r-Rabbânî- yeniçeri kaleminde sâbıkan başhalîfe olan umdetü’t-tahrîr ve’l-kalem zübdetü ashâbi’t-tastîr ve’r-rakam kıdvetü’l-e‘âlî ve’l-e‘âzim el-muhtas bi mezîdi inâyeti’l-meliki’s-Samed hâmilü’l-kitâbi’l-müstetâb Abdüllatîf Efendi b. Mehmed mahzarında bi’t-tav‘ ve’r-rızâ ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik ve zabt u tasarrufumda münharıt olan emlâkimden Havâss-ı Aliyye kazâsına tâbi‘ Yassıviran nâm karyede vâki‘ bir tarafdan a‘lemü’l-ulemâ’i’l-izâm Caferzâde Efendi mülkü ve üç tarafdan tarîk-i âm ile mahdûd muhavvata-i dâhiliyyesi iki bâb tahtânî oda ve bir sofa ve iki anbar ve zât-ı eşcâr-ı müsmire ve gayr-ı müsmire bahçeyi ve muhavvata-i hâriciyyesi iki bâb tahtânî oda ve bir sofa ve iki ahır ve bir su kuyusu ve ve zât-ı eşcâr-ı müsmire ve gayr-ı müsmire bahçe ve karşısında bir kıt‘a bağı müştemil olup bundan akdem Mehmed Ağa b. Mehmed nâm kimesne Sâliha Hâtun bt. Mehmed’den iştirâ edip ben dahi sene seb‘în ve elf Şa‘bânü’l-mu‘azzamı’nın on birinci günü mûmâ-ileyhâ Sâliha Hâtun’dan iştirâ eylediğim çiftlik ta‘bîr olunur mülk menzilini cemî‘ tevâbi‘ ve levâhıkı ve âmme-i menâfi‘ ve merâfıkı ile ve menzil-i mezbûrun üst tarafında olan harâbe nîm değirmeniyle ve Siyavuş nâm Rûsiyyü’l-asl bir abd-i memlûk ve Gülistan nâm Macariyyetü’l-asl bir câriye-i memlûke Hasan nâm velediyle ve beynimizde kadri ma‘lûm mezrû‘ât ve menzil-i mezbûrda mevcûd bir çift su sığırı ve bir çift kara sığırı öküzleri ve bir çift su sığırı ineği ve bir büyük ve bir küçük saban mükemmel âletleri ile ve iki mükemmel araba ve bir döğen ve sâir âlât-ı zirâ‘at ve esvâb-ı harâsetiyle müşârün-ileyh Abdüllatîf Efendi’ye elli bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi minvâl-i muharrer iştirâ ve tesellüm ve kabz ve kabûl edip yine mezbûre Sâliha Hâtun’dan hîn-i bey‘de tefevvüz etmekle tefvîz-i âtî sudûruna değin zabt ve taht-ı tasarrufumda olup merhûm ve mağfûrun leh Ebü’l-feth el-Gāzi Sultan Mehmed Hân Gāzi evkāfı arâzisinden olup çiftlik-i mezbûr intimâ ile tahdîd ve tavsîfden müstağnî on yedi kıt‘a tarla ve dört kıt‘a çayırlarının hakk-ı tasarruflarını evkāf-ı mezbûre mütevellîsi ma‘rifetiyle on bin akçe bedel mukābelesinde müşârün-ileyh Abdüllatîf Efendi’ye tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip semen-i mezbûr ile bedel-i merkūm ki cem‘an altmış bin akçeyi bi’t-tamâm ve’l-kemâl mûmâ-ileyh Abdüllatîf Efendi yedinden alıp kabz edip çiftlik-i mezbûr ve içinde mevcûd bâlâda mezkûr olan abd-i memlûk ve câriye-i memlûke ve veledi ve mevâşî-i merkūme ve sâir âlât ve esvâb-ı harâset mezbûr Abdüllatîf Efendi’nin mülk-i müşterâsı ve arâzi-i merkūme dahi dâhil-i havza-i tasarrufu olmuşdur, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ cerâ kayd şüd. Fi’l-yevmi’s-sâlis aşer min şehri Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çelebi Ser-şikâriyân-ı hâssa hâlâ, Musa Beşe Şikârî, Mehmed Çelebi Saraczâde, Hasan Efendi b. Mahmud, Musa Çelebi b. Ali, Ali Çelebi b. Kasım, Mehmed Çelebi b. Receb, İvaz Beşe b. Mehmed er-Râcil, Hasan b. İvaz, El-Hâc Hasan Beşe er-Râcil, Mehmed Çelebi b. Musli, Hamza Efendi nâib-i recül ve gayruhüm mine’l-hâzırîn.