Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 318 Hüküm no: 327 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sağır, dilsiz ve mecnûne olan karısı Rabia bt. Hüdâverdi ile geçinemeyen diğer eşinin ayrı evlerde oturması için Receb b. Abdullah’a tenbihatta bulunulması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesinde sâkin bâ‘isü’l-kitâb Mustafa Çelebi b. Hüdâverdi meclis-i şer‘de eniştesi Receb Bey b. Abdullah nâm kimesne mahzarında üzerine takrîr-i da‘vâ edip mezbûr Receb Bey’in hâlâ taht-ı nikâhında olan li ebeveyn hemşîrem Râbia bt. Hüdâverdi nâm esamme ve mecnûneyi medîne-i mezbûrede kiremitçi Süleyman evkāfında icâre-i mu‘accele ve müeccele ile taht-ı icâremde olan bir bâb odamda iskân etmişiken zevci mezbûr Receb Bey âhar zevcesini dahi getirip hemşîrem ile iskân eylediğinden mâ‘adâ hemşîrem mezbûrenin darresiyle hüsn-i zindegânesi olmamağla her bâr müte’ezziyedir, hâlâ suâl olunup zevcesini âhar menzile ihrâc etmek üzre kıbel-i şer‘den eniştem merkūm Receb Bey’e tenbîh olunmak matlûbumdur deyicek gıbbe’s-suâl mezbûr Receb Bey meclis-i şer‘de zevceteyni beyt-i vâhidde sâkine idiğini ikrâr etmeğin min ba‘d her birini alâ hiddetin bir menzilde iskân edip zevciyyeti beyninde alâ mâ emerallâhü te‘âlâ adâlet etmek üzre merkūm Receb Bey’e tenbîh-i şer‘î ve üç gün mehil verilip mâ cerâ bi’t-taleb kayd şüd. Fi’l-yevmi’s-sâlis aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çelebi b. Mahmud, Receb Bey b. Maden, Hüseyin Çelebi b. Tayyib, Hasan muhzır ve gayruhüm mine’l-hâzırîn.