Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 324 Hüküm no: 332 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anderon v. Polihroni’nin tarlalarının kullanım hakkını Yani v. Yorgi ile Yani v. Todori’ye devretmesi Vilâyet-i Rumeli’nde Kalavrita kazâsına tâbi‘ Granitse nâm karye zimmîlerinden olup hâlâ mahmiye-i İstanbul’da Eskiodalar başında aşçı olan Anderon v. Polihroni nâm zimmî meclis-i şer‘de işbu hâmilü’l-vesîka Yani v. Yorgi kendi tarafından asâleten ve bâyi‘-i mezbûrun kız karındaşının kızı oğlu diğer Yani v. Todori kıbelinden ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olmağın vekâleti muvâcehesinde ikrâr ve takrîr-i kelâm edip tefvîz-i âtî sudûruna değin zabt ve taht-ı tasarrufumda olup Tripoliçe kazâsı a‘mâlinden Komente nâm karye sınırı dâhilinde Eskihisar nâm mevzi‘de vâki‘ bir tarafdan zeyl-i cebel ve bir tarafdan vâdi ve bir tarafdan tarîk-i âm ile mahdûd tahmînen sekiz keyl tohum istî‘âb [eder] bir kıt‘a tarla ki ortasında harâbe yel değirmeni ve harman yeri vardır ve Palyokato nâm mahalde vâki‘ bundan akdem Hüseyin Çavuş oğlundan tefevvüz eylediğim ma‘lûmetü’l-hudûd bir kıt‘a ve yine Kalavrita kazâsına tâbi‘ Çoşe nâm mevzi‘de inde’l-ahâlî ve’l-cîrân ma‘lûmetü’l-hudûd biri biri yanında yedi kıt‘a tarla ki alt tarafında yol ve üst tarafında mecrâ-yı mâî ve tarafeyni Franko Velisar tarlalarıyla mahdûddur cem‘an dokuz kıt‘a tarlalarımın hakk-ı tasarruflarını, ma‘rifet-i sâhib-i arz ile merkūm Yani ve diğer Yani’ye ale’l-iştirâki’s-seviy yüz kıt‘a riyâlî guruş bedel mukābelesinde tefvîz bi’l-ferâğ eylediğimde anlar dahi vech-i muharrer üzre tefevvüz ve kabûl edip bedel-i ferâğ olan mezbûrü’n-na‘t yüz guruşu nısfiyyet üzre merkūmân Yani ve diğer Yani yedlerinden alıp kabz edip mârrü’z-zikr tarlaları mahallerinde zabt u tasarrufa tarafımdan merkūmân Yani ve kız karındaşı kızının oğlu merkūm diğer Yani’yi taslît eyledim min ba‘d mârrü’z-zikr tarlalar merkūmân Yani ve diğer Yani’nin dâhil-i taht-ı tasarrufu olmuşdur emsâli gibi mutasarrıf olsun dedikde gıbbe’t-tasdîk mâ hüve’l-vâki‘ kayd şüd. Fi’l-yevmi’s-sâdis aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Şaban Efendi el-Müderris, umdetü’l-müderrisîn Mustafa Efendi b. Hasan, Hüseyin Muhzır, Receb Kethüdâ ve gayruhüm mine’l-hâzırîn.