Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 324 Hüküm no: 333 Orijinal metin no: [74a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anderon v. Polihroni’nin menzili, bağ ve bostanlarını Yani v. Yorgi ile Yani v. Todori’ye satması Vilâyet-i Rumeli’nde cezîre-i Mora’da Kalavrita kazâsına tâbi‘ Granitse nâm karye zimmîlerinden olup mahmiye-i İstanbul’da Eskiodalar başında aşçı olan Anderon v. Polihroni nâm zimmî meclis-i şer‘de işbu hâmilü’l-vesîka Yani v. Yorgi nâm zimmî kendi tarafından asâleten ve bâyi‘-i mezbûrun kız karındaşının kızı oğlu diğer Yani v. Todori nâm zimmî tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olmağın muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan yaycı Panayot mülkü ve bir tarafdan Benli İstamelli ve bir tarafdan İstemato bağı ve bir tarafdan tarîk-i âm ile mahdûd, üç bâb tahtânî oda ve bir ahır ve bir şarâbhâne ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bi cümleti’t-tevâbi‘ ve’l-levâhık ve menzil-i mezbûr kurbunda vâki‘ inde’l-ahâlî hudûdları ma‘lûme Emo ve Yorgi Gramali nâm zimmîlerden iştirâ eylediğim harâbe menzilleri, cemî‘-i tevâbi‘ ve levâhıklarıyla ve karye-i mezbûre sınırı dâhilinde vâki‘ adedleri beynimizde ma‘lûm mülk dut ve badem ve üzüm ve ceviz ve armud eşcârımı ve yine karye-i mezkûre sınırı dâhilinde vâki‘ inde’l-ahâlî ve’l-cîrân hudûdları ma‘lûme sekiz kıt‘a mülk bağları ve iki kıt‘a bostanlarımı bi cümleti’l-hukūk ve’l-luhûk merkūmân Yani ve diğer Yani’ye ale’l-iştirâki’s-seviy yüz kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i kat‘î ile bey‘ edip anlar dahi vech-i muharrer üzre iştirâ ve kabûl eylediklerinden sonra yine tefvîz-i âtî sudûruna değin zabt ve taht-ı tasarrufumda olup inde ahâliyi’d-diyâr ma‘lûmetü’l-hudûd ve’l-kıta‘ ve’l-mikdâr tarlalarımın dahi hakk-ı tasarruflarını, ma‘rifet-i sâhib-i arz ile merkūm Yani ve kız karındaşım kızı oğlu diğer Yani’ye ale’l-iştirâki’s-seviy elli kıt‘a riyâlî guruş bedel mukābelesinde tefvîz bi’l-ferâğ eylediğimde anlar dahi vech-i muharrer üzre tefevvüz ve kabûl edip semen-i mezbûr ile bedel-i merkūm ki cem‘an yüz elli kıt‘a riyâlî guruşunu tamamen nısfiyyet üzre [74b] merkūm[ân] Yani ve diğer Yani yedlerinden alıp kabz edip emlâk-i mezbûr ve arâzi-i ma‘lûmede kat‘an alâkam kalmadı ba‘de’l-yevm emlâk-i mezbûre nısfiyyet üzre merkūmân Yani ve diğer Yani’nin mülk-i müşterâsı ve arâzi dahi ale’l-iştirâki’s-seviy dâhil-i taht-ı tasarrufları olmuşdur, min ba‘d emlâk-i mezbûre ve arâzi-i merkūmeyi mahallinde zabt ve taht-ı tasarrufa tarafımdan merkūmânı taslît eyledim dedikde gıbbe’t-tasdîk mâ hüve’l-vâki‘ kayd şüd. Fi’l-yevmi’s-sâdis aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Şaban Efendi el-Müderris, Mustafa Efendi nâib-i Hasköy el-Müderris, Hüseyin muhzır ve gayruhüm mine’l-hâzırîn.