Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 325 Hüküm no: 334 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Hacı Pîrî’nin alacak hususunda Yorgi v. İstati ile sulh olması Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de vâki‘ Câmi‘-i Kebîr mahallesi sâkinlerinden Hüseyin Çelebi b. El-Hâc Pîrî meclis-i şer‘-i hatîr-i lâzımü’t-tevkīrde Havâss-ı Aliyye kazâsına tâbi‘ Karfa nâm karye sükkânından işbu râfi‘ü’s-sifri’ş-şer‘î Yorgi v. İstati nâm zimmî muvâcehesinde ikrâr ve takrîr-i kelâm edip bundan akdem merkūm Yorgi zimmetinde her bir re’si yüz altmış akçeye olmak üzre yüz yirmi re’s koyun semeninden on dokuz bin iki yüz akçe hakkım olup meblağ-ı mezbûru merkūm Yorgi’den taleb ve da‘vâ eylediğimde ol dahi inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip meblağ-ı mârrü’z-zikr on dokuz bin iki yüz akçe da‘vâsından merkūm Yorgi ile beni iki bin nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t iki bin akçeyi merkūm Yorgi yedinden tamamen alıp kabz edip mâ‘adâ da‘vâsından zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allik merkūm ile vechen mine’l-vücûh ve sebeben mine’l-esbâb da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm istimâ‘ olunmaya deyicek mukırr-ı mezbûrun minvâl-i meşrûh üzre cârî ve sâdır olan ikrârını merkūm Yorgi vicâhen tasdîk ve şifâhen tahkīk etmeğin mâ cerâ bi’l-ibtigā ketb olundu. Fi’l-yevmi’s-sâlis aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mustafa Çavuş el-Mübâşir, Mustafa Beşe b. Abdullah, İbrahim Beşe b. Mustafa, Ak Mehmed Beşe, muhzır Mehmed, Hüseyin muhzır ve gayruhüm mine’l-hâzırîn.