Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 326 Hüküm no: 335 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Kenan’ın istiğlâl yoluyla Takyecibaşı Vakfı’na sattığı ev üzerindeki rehinin, borcunu ödemesi dolayısıyla kaldırılması Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de vâki‘ Takyecibaşı vakf eylediği nukūda bi’l-fi‘l mütevellî olan Mehmed Çelebi b. Ahmed tarafından hâlâ vakf-ı mezbûr kāimmakāmı olan fahrü’l-eimme Mustafa Efendi b. Ahmed meclis-i şerî‘at-ı şerîfede işbu râfi‘atü’l-vesîka Fâtıma bt. Kenan nâm hâtun tarafından ikrâr-ı âti’l-beyânı tasdîke vekîl olup bimâ hüve nehci’s-sübût şer‘an vekâleti sâbite olan zevci Mustafa Bey b. Ahmed mahzarında ikrâr ve takrîr-i kelâm edip müvekkile-i mezbûrenin emlâkinden olup mahalle-i mezbûrede vâki‘ bir tarafdan Ümmî Sinan zâviyesi ve bir tarafdan Ali Çelebi mülkü ve iki tarafdan tarîk-i âm ile mahdûd olan mülk menzilini bundan akdem Havâss-ı Aliyye kadısı merhûm İsâ Efendi zamânında hilâfete müvellâ olan Halîfezâde Mustafa Efendi imzâsıyla mümzâ mâl-ı vakf-ı mezbûr ile mütevellî-i vakf-ı mersûma altı bin yedi yüz ceyyid ve cedîd akçeye bi tarîki’l-istiğlâl bey‘ ve teslîm edip müvekkile-i mezbûre minvâl-i muharrer üzre istîcâr ve kabz etmişidi el-hâletü hâzihî meblağ-ı sâlifü’z-zikr altı bin yedi yüz akçeyi müvekkile-i mezbûre Fâtıma Hâtun yedinden kāimmakām-ı mütevellî olduğumuz hasebiyle vakf-ı mezbûr için bi’t-tamâm ve’l-kemâl alıp kabz edip rehn-i mezbûru fek ve menzil-i mezbûru müvekkile-i mersûme Fâtıma Hâtun’a teslîm eyledim deyicek mukırr-ı mezbûrun minvâl-i meşrûh üzre cârî ve sâdır olan ikrârını vekîl-i mezbûr Mustafa Bey bi’l-vekâle vicâhen tasdîk ve tahrîk etmeğin mâ hüve’l-vâki‘ kayd şüd. Fi’l-yevmi’s-sâlis aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çavuş b. Malkoç, eş-Şeyh Kasım Efendi b. Hamza, Hüseyin Çelebi b. Mustafa, Mahmud Ağa b. İsmail, Mehmed Çelebi b. Abdülkādir, Mustafa Efendi b. Ahmed, Ali Dede b. Yahya, Mustafa Çelebi b. Mustafa ve gayruhüm mine’l-hâzırîn.