Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 327 Hüküm no: 336 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Franko’nun küçük çocukları Estamo ve Kogo üzerlerine amcaları Dimo’nun vasî tayin olunması Fi’l-asl vilâyet-i Rumeli’nde Gerbeniş kazâsına tâbi‘ İstarye nâm karye sükkânından olup medîne-i Hazret-i Ebâ Eyyûb-i Ensârî’de vâki‘ Çömlekçiler çarşısında mütemekkin iken bundan akdem hâlik olan Yani v. Franko nâm hâlikin verâseti, zevcesi Kali bt. Mihal nâm nasrâniye ile vâlidesi Estamo nâm nasrâniyeye ve sulbiye sagīre kızları Estamo ve Kogo bintey Yani’ye münhasıra olduğu şer‘an zâhir ve mütehakkik oldukdan sonra mezbûretân Estamo ve Kogo nâm sagīrelere babası hâlik-i mezbûrdan irs-i şer‘le isâbet ve intikāl eden emvâllerini zabt ve her hâllerini hıfz için bir vasî lâzım ve mühim olmağın hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi hâlik-i mezbûrun li ebeveyn karındaşı ve sagīretân-ı mezbûretânın ammileri olan işbu râfi‘ü’l-vesîka Dimo v. Franko nâm zimmîyi sagīretân-ı mezbûretâna vasî nasb ve ta‘yîn etmeğin ol dahi vesâyet-i mezbûreyi kabûl ve hıdemât-ı lâzımesini edâya ta‘ahhüd ve iltizâm etmeğin mâ hüve’l-vâki‘ kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hüseyin Çelebi b. Ali, diğer Hüseyin Beşe b. Hasan, Mehmed Çelebi b. ( ) Çukadâr, Mehmed b. Ahmed el-Muhzır ve gayruhüm mine’l-hâzırîn.