Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 327 Hüküm no: 337 Orijinal metin no: [75a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Hasan b. Abdullah’ın öldürülen çoban Balaban’ın zannederek beytülmâl tarafından zabtedilen koyunlarının kendisine iadesi Çoban tâifesinden işbu râfi‘ü’l-kitâb Hasan b. Abdullah nâm kimesne mahfil-i kazâda hâlâ beytülmâl-i âmme emîni olan zikri âtî koyunlara vaz‘-ı yedi ikrârıyla sâbit olan Mehmed Ağa b. Mehmed mahzarında üzerine takrîr-i da‘vâ edip Havâss-ı Aliyye kazâsına tâbi‘ Topçular nâm mevzi‘e karîb Çiço Çiftliği demekle ma‘rûf çiftlik mukābelesinde vâki‘ koyun keçesi yanında bundan akdem katîlen hâlik olan Balaban v. Mitre nâm çobanın koyunlarıyla benim dahi bî-nişân iki yüz on sekiz re’s sağmal koyunumu yaylar iken hâlik-i mezbûr katîlen mürd olmağla emîn-i mezbûr benim zikr olunan koyunlarımı dahi hâlik-i mezkûrun mülkü olmak zu‘muyla mîrî için zabt ve vaz‘-ı yed etmişdir hâlâ suâl olunup kasr-ı yedine tenbîh olunmak matlûbumdur deyicek gıbbe’s-suâl emîn-i mezbûr mârrü’z-zikr iki yüz on sekiz re’s bî-nişân koyunlara vaz‘-ı yedini ikrâr, lâkin müdde‘î-i mezbûrun mülk olduğunu inkâr ile cevâb vermeğin müdde‘î-i mezbûrdan müdde‘âsını mübeyyine beyyine taleb olundukda, udûl-i ricâlden yoğurtçu tâifesinden Mehmed Beşe b. Abdullah ve Süleyman b. Ali nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-vâki‘ mârrü’z-zikr iki yüz on sekiz re’s bî-nişân sağmal koyun müdde‘î-i mezbûrun mülküdür, hâlik-i mezbûrun koyunlarıyla ma‘an mahall-i mezkûrda yaylar idiği ma‘lûmumuzdur biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mârrü’z-zikr koyunları küllen ve ba‘zan hâlik-i mezbûre bey‘ veya hibe veya taraf-ı şer‘iyyeden biriyle mülkünden ihrâc eylemediğine müdde‘î-i mezbûra yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mûcebiyle mârrü’z-zikr iki yüz on sekiz re’s koyunlardan emîn-i mezbûrun kasr-ı yedine tenbîh birle mâ hüve’l-vâki‘ bi’t-taleb kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hasan Çavuş el-Mübâşir, Ali Beşe Çukadâr, Mehmed Beşe b. Musli, Hüseyin Çelebi el-Muhzır, Dilâver muhzır ve gayruhüm mine’l-hâzırîn.