Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 328 Hüküm no: 338 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yuvan v. Mitre’nin, öldürülen çoban Balaban v. Mitre’nin kardeşi olduğunun şahitlerle ispatı Fi’l-asl vilâyet-i Rumeli’nde Manastır kazâsına tâbi‘ Boristere? nâm karye sâkinlerinden bâ‘isü’l-vesîka Yuvan v. Mitre nâm zimmî meclis-i şer‘de hâlâ gümrük emîni olan fahrü’l-akrân Mahmud Ağa b. Hasan tarafından beytülmâl-i âma zabtına memûr olup metrûkât-ı âti’z-zikre vaz‘-ı yedi ikrârıyla sâbit olan Mehmed b. Mehmed mahzarında üzerine da‘vâ ve takrîr-i kelâm edip târih-i kitâbdan üç gün mukaddem Havâss-ı Aliyye kazâsında Topçular nâm mahal kurbunda Çiço Çiftliği mukābelesinde [katîlen hâlik olan] Balaban v. Mitre nâm zimmînin ben li ebeveyn karındaşı olup hâlik-i merkūmun metrûkâtı bi’l-irsi’ş-şer‘î bana isâbet ve intikāl eylediğin emîn-i mezbûr hâlik-i merkūmun vârisi olmamak zu‘muyla yüz yirmi re’s koyununa vaz‘-ı yed etmişdir hâlâ suâl olunup kasr-ı yedine tenbîh olunmak matlûbumdur deyicek gıbbe’s-suâl emîn-i mezbûr hâlik-i merkūmun minvâl-i muharrer üzre yüz yirmi re’s koyununa vaz‘-ı yedini ikrâr lâkin müdde‘î-i mezbûrun minvâl-i mübeyyen üzre verâsetini inkâr ile cevâb vermeğin müdde‘î-i mezbûr Yuvan’dan müdde‘âsını mübeyyine beyyine taleb olundukda karye-i mezbûre sükkânından Nikola v. Yani ve Andriye v. Dimo nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ müdde‘î-i mezbûr Yuvan hâlik-i merkūmun li ebeveyn karındaşıdır, zirâ‘ babaları ismi Mitre anaları ismi Sivete nâm nasrâniyedir ve maskat-ı re’sleri karye-i mezbûredir, müdde‘î-i mezbûr için hakk-ı taleb ve ahz vardır. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde isbât-ı nesebde müslim beytülmâl [emîni] yüzüne zimmînin şehâdeti makbûle idiği kütüb-i fıkhiyye-i mu‘teberâtda mastûr ve musarrah olmağla gıbbe ri‘âyeti şerâiti’l-kabûl şehâdetleri makbûle olmağın müdde‘î-i mezbûr Yuvan’ın verâsetine hüküm birle mâ hüve’l-vâki‘ bi’t-taleb kayd şüd. Fi’l-yevmi’s-sâdis ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Ağa b. Osman Nâzır ağa tevâbi‘i, Hasan Çavuş el-Mübâşir, çukadâr Mehmed Beşe, diğer Çukadâr Ali Beşe ve gayruhüm mine’l-hâzırîn.