Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 334 Hüküm no: 345 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın boşandığı kocası Hasan Halife b. İbrahim’in zimmetini ibrâ etmesi Yâ Fettâh Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Servi mahallesi sâkinelerinden Fâtıma bt. Abdullah nâm hâtun meclis-i şerî‘at-ı şerîfede zevc-i sâbıkı olup mahalle-i mezbûrede hâlâ imâm olan bâ‘isü’l-kitâb Hasan Halîfe b. İbrahim nâm kimesne mahzarında bi tav‘ihâ ikrâr ve takrîr-i kelâm edip mezbûr Hasan Halîfe bundan akdem zevcim olup beynimizde hüsn-i zindegânemiz olmamağın beni talâk-ı bâyin ile tatlîk etmeğin hâlâ zimmetinde mütekarrir olan üç bin akçe mehr-i müeccelimi ve nafaka-i iddet ve me’ûnet-i süknâm için dahi beş yüz akçe ki cem‘an üç bin beş yüz [akçe]mi bi’t-tamâm ve’l-kemâl zevc-i sâbıkım mezbûr Hasan Halîfe yedinden alıp kabz edip zevciyyete müte‘allik âmme-i de‘âvî ve mütâlebât ve eymân ve muhâsamâtdan zevc-i sâbıkım mezbûr Hasan Halîfe’nin zimmetini ibrâ ve iskāt eyledim dedikde mezbûr Hasan Halîfe dahi meclis-i mezbûrda fi’l-vâki‘ hâl minvâl-i muharrer üzre olup ben dahi zevce-i sâbıkam mezbûre Fâtıma’nın zimmetini zevciyyete müte‘allik cemî‘-i de‘âvîden ibrâ eyledim deyû cemî‘-i kelimâtını vicâhen tasdîk etmeğin mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: İsâ Efendi b. Kalender, Mahmud Efendi b. Mehmed, Hüseyin Dede el-Halvetî, Mustafa Çelebi b. Hüsameddin, Veli Çelebi b. İsâ ve gayruhüm mine’l-hâzırîn.