Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 334 Hüküm no: 346 Orijinal metin no: [76b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın Ali Beşe b. Memi ile kızı Menzile’ye borcuna Çiftalan köyünden bazılarının kefil olması Havâss-ı Refî‘a kazâsı iktâ‘ından Terkos nâhiyesine tâbi‘ Çiftalan nâm karye sükkânından Mustafa b. Ömer ve Himmet b. Maksud ve Tayyib b. Muharrem [ve] Selman b. Mehmed ve Hüseyin b. Memi ve Hasan b. Mehmed ve diğer Hasan b. Ali ve Yusuf b. Abdullah ve Hüseyin b. Abdullah ve diğer Hüseyin b. Abdullah ve Hasan b. Abdullah nâm kimesneler meclis-i şer‘-i hatîr-i lâzımü’t-tevkīrde hâlâ mecrûh olmağla meclis-i şer‘a huzûru müte‘azzir olan Ali Beşe b. Memi tarafından tasdîk-i âti’z-zikre vekîl-i şer‘î-i sâbitü’l-vekâle olan üvey oğlu diğer Ali Beşe nâm râcil ile mecrûh-ı mezbûrun kızı Menzile nâm hâtun mahzarlarında, her biri ikrâr ve takrîr-i kelâm edip yine karye-i mezbûre sükkânından olup hâlâ zâbıta yedinde mahbûs olan Mehmed b. Abdullah nâm kimesnenin müvekkil-i mezbûra Ali Beşe ile sulbiye kebîre kızı mezbûre Menzile Hâtun’a cihet-i deyn-i şer‘îden zimmetlerinde lâzımü’l-edâ ve vâcibü’l-kazâ deyni olan beş bin akçeyi târih-i kitâbdan üç yüz altmış gün tamâmına değin müvekkil-i mezbûr Ali Beşe ile kızı mezbûre Menzile Hâtun’a edâ ve teslîme her birimiz emr ve kabûlü hâvî kefâlet-i sahîha-i şer‘iyye ile kefîl olmuşdur deyû bi tav‘ihim ikrâr ve i‘tirâf eyledikleri[nde] ba‘de’l-kabûl ve’t-tasdîk mâ cerâ kayd şüd. Fi’t-târihi’l-mezbûr. Şuhûdü’l-hâl: Receb Bey b. Maden, Mehmed Ağa zâbit-i karye-i mezbûre, Mehmed Beşe b. Musli, Hüseyin b. Halil, Dilâver Muhzır ve gayruhüm.