Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 335 Hüküm no: 347 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Abdullah’ın oğlunun yeni vasîsinin eski vasînin zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Evlice Baba mahallesinde sâkin iken bundan akdem vefât eden El-Hâc Yusuf b. Abdullah nâm müteveffânın sulbî sagīr oğluna, babası müteveffâ-yı mezbûrdan bi’l-irsi’ş-şer‘î isâbet ve intikāl eden emvâlini zabt ve sagīr-i mezbûrun her hâlini hıfz için mukaddemâ sagīr-i mezbûr üzerine kıbel-i şer‘den vasî nasb ve ta‘yîn olunmuşken, hâlâ diyâr-ı âhara teveccüh ve azîmet etmekle kendi azlini iltimâs etmeğin azl ve yerine sagīr-i mezbûr üzerine vasî nasb ve ta‘yîn olunan Mehmed Beşe b. Musli meclis-i şer‘de vasiyy-i sâbık El-Hâc Halil b. Maden mahzarında ikrâr ve takrîr-i kelâm edip müteveffâ-yı mezbûrun eyâdî-i nâsda olup ba‘de vefâtihî oğlu sagīr-i mezbûra intikāl eden malından vasiyy-i sâbık-ı mezbûr El-Hâc Halil zamân-ı vesâyetinde El-Hâc Ali’den on dokuz bin yüz otuz akçe ve Himmet’den dahi yedi bin beş yüz akçe ve Kanberoğlu’ndan yirmi üç bin akçe ki [cem‘an] kırk dokuz bin altı yüz otuz akçe alıp kabz edip meblağ-ı mezbûrun altı yüz on dört akçe sagīr-i mezbûrun kisvesine ve üç bin dokuz yüz altmış akçesini nafaka-i mefrûzasına ve beş bin beş yüz yirmi beş akçesini ber mûceb-i defter-i kassâm müteveffâ-yı mezbûrun techîz ve tekfînine ve resm-i kısmetine harc ve sarf etmişdi el-hâletü hâzihî vasiyy-i sâbık-ı mezbûr el-Hâc Halil’in ba‘de’l-azl muhâsebesini hâkim-i muvakki‘-i sadr-ı kitâb huzûrunda gördüğümde sagīr-i mezbûrun mâl-ı mevrûsundan makbûzu olan otuz yedi bin dört yüz seksen akçeyi bir def‘a ve kendi mesârifine sarf eylediği dört bin akçeyi bir def‘a vasiyy-i sâbık yedinden bi’l-vesâye alıp kabz edip zimmetinde sagīr-i mezbûr malından bir akçe bâkī kalmadı dedikde gıbbe’t-tasdîk mâ hüve’l-vâki‘ kayd şüd. Fî evâhir-i Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: El-Hâc Ali b. Ramazan, Abdi Çelebi b. Abdullah, el-Hâc Ali b. Mustafa, Yunus Beşe b. Müyesser, Ali Efendi b. Mustafa ve gayruhüm mine’l-hâzırîn.