Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 340 Hüküm no: 352 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kömürlü Belgrad ile Orta Belgrad köyleri ile Burgaz ve Bahçe-i Belgrad köyleri arasında mera davası Havâss-ı Aliyye kazâsı tevâbi‘inden Terkos nâhiyesine tâbi‘ Suyolu nâzırı karyelerinden Kömürlü Belgrad ve Orta Belgrad karyeleri re‘âyâlarından işbu bâ‘isü’l-vesîka Yani v. Yorgi ve Kosta v. Vasil ve diğer Kosta Midyeli Dimitraki v. Foti ve diğer Dimitraki v. Vasil ve Andriye v. Dimitri ve Yorgo v. Nikola ve Avyori v. Mihal ve İskoli v. Aleksandri ve Todori v. Dimitri ve Üstüyan v. Nikola ve Panayot v. Nikola ve Manol v. Şimo ve Panayot v. Labezno nâm zimmîler ve sâirler bi ecma‘ihim meclis-i şer‘de karyeteyn-i mezbûreteynin mer‘âlarıyla mer‘âları mülâsık yine su nâzırı karyelerinde Burgaz nâm karye zimmîlerinden Aleksi v. Yani ve Piyo v. Mihal ve Dimo v. Şirpolo ve Bahçe-i Belgrad nâm karye re‘âyâsından Pendazi v. Yorgi ve [Sa]kosta v. Yanaki ve Paroş v. Andriye ve Andon v. Apostol ve Şanadi v. Yani ve sâirleri muvâcehelerinde her biri takrîr-i kelâm ve bast-ı merâm edip bizim karyelerimizin mer‘âsı kadîmî mârrü’z-zikr Burgaz ve Bahçe-i Belgrad karyeleri mer‘âlarına mülâsık olup lâkin mer‘âlarımız merhûm ve mağfûrun-leh Sultan Bayezid Hân-ı Velî evkāfı arâzisinden olmağla hâlâ mer‘âmız için senevî mukāta‘a takdîr ettirdip evkāf-ı mezbûre mütevellîsi kıbelinden temessükünü almak murâdımızdır, bizim karyelerimizin feth-i hâkānîden bu âna gelince mer‘âsı sınırı olan Mandıracı köprüsü andan Ayazma Deresi’ne andan Mimar Ağa’nın Yeni kışlası’nın sağ tarafından Eski Kışla’ya andan Ayas Ağa karyesi yoluna andan Kurd tarlasına andan Yafta demekle ma‘rûf mahal ki bir tarafı Bahçe-i Belgrad mer‘âsı sınırıdır, andan araba yolu ile Vâlide Sultan hazretleri suyu yoluna andan Vigla nâm mahal ki tarîk-i âm ile Kopuzpınarı’na varır ki bir tarafı Bahçe-i Belgrad mer‘âsı sınırıdır, andan Tonuz Deresi yolunda olan Ayazma’ya andan Çanya deresi’ne andan armudluğa andan Bozalan’a andan tarîk-i âm ile bir tarafdan Davudpaşa korusu ve bir tarafdan karyeteyn-i mezbûreteyn mer‘âsı sınırıdır, andan Bâlioğlu kemeri’ne müntehîdir, zikr olunan hudûd içinde olan otlak ve fundalık mârrü’z-zikr Kömürlü Belgrad ve Orta Belgrad mer‘âsıdır el-hâletü-hâzihî zikr olunan mer‘âmızda sâlifü’z-zikr Burgaz ve Bahçe-i Belgrad karyeler ahâlîlerinin alâka ve medhalleri var mıdır, suâl olunup takrîrleri tahrîr olunmak matlûbumuzdur dediklerinde gıbbe’s-suâl mezbûrûn zimmîler cevâblarında fi’l-hakīka hudûd-ı mezkûr ile mahdûd olan otlak ve fundalık kadîmü’l-eyyâmdan mârrü’z-zikr Kömürlü Belgrad ve Orta Belgrad mer‘âsıdır, bizim alâka ve medhalimiz yokdur; zikr olunan mer‘âyı hîn-i fetihden bu âna gelince karyeteyn-i mezbûreteyn ahâlîleri zabt ve tasarruf edegelmişlerdir ba‘de’l-yevm dahi mukāta‘a takdîr ettirdip evkāf-ı mezbûre mütevellîsinden temessük alıp ke’l-evvel keyfe mâ yeşâ’ mutasarrıf olsunlar dediklerinde vâki‘ü’l-hâl merkūmûn talebleriyle ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-akrân Mehmed Ağa zâbit-i karye-i mezbûre, el-Hâc İbrahim Ser-bölük, İsmail Çelebi Râh-ı âbî, Receb Bey b. Kasım, Sinan Bey [b.] ( ) el-Cündî, diğer Receb Bey kethüdâ ve gayruhüm mine’l-hâzırîn.