Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 345 Hüküm no: 358 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Huri bt. Mehmed’in mirası hususunda vârislerinin davalı oldukları Receb Efendi’nin zimmetini ibrâ etmesi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Takyecibaşı mahallesi imâmı Receb Efendi b. Yusuf’un menzilinde mütemekkine iken bundan akdem vefât eden Şerife Huri bt. Mehmed’in verâseti, oğlu Mehmed b. Ali nâm şâbb-ı emred ile oğlu kızları Sâliha ve Ayşe bintey Ali nâm hâtunlara münhasıra olduğu şer‘an zâhir ve müte‘ayyin oldukdan sonra mezbûr Mehmed ile mezbûre Sâliha asâleten ve merkūme Ayşe tarafından da‘vâ-yı âti’z-zikri sulh ve ibrâya ve bedel-i sulhü ahz ü kabza vekîl olup mezbûrenin zâtını ma‘rifet-i şer‘iyye ile ârifân olan Mehmed b. Sefer ve ( ) b. ( ) şehâdetleriyle şer‘an vekâleti sâbite olan vâlidesi Sâime bt. Ali nâm hâtun vekâleten meclis-i şer‘de muhallefât-ı câ’i’z-zikre vaz‘-ı yedi ikrârıyla sâbit olan hâfızü’l-kitâb mezbûr Receb Efendi mahzarında her biri asâleten ve vekâleten ikrâr ve takrîr-i kelâm edip mûrisemiz müteveffâ-yı mezbûre Şerife Huri, bundan akdem bize incinip esvâb [ve] eskāl ile merkūm Receb Efendi’nin menzilinde mütemekkine iken vefât etmeğin mezbûr Receb Efendi, mecmû‘-ı muhallefâtını zabt ve vaz‘-ı yed etmeğin biz dahi muhallefât-ı müteveffât-ı mezbûreyi merkūm Receb Efendi yedinden bi’l-asâle ve bi’l-vekâle taleb ve da‘vâ eylediğimizde merkūm Receb Efendi mûrisenizi müteveffât-ı mezbûre hâl-i hayâtında ve kemâl-i akl-i sıhhatinde cemî‘-i tasarrufât-ı şer‘iyyesini nâfize olduğu hâlde mecmû‘-ı muhallefâtını bana hibe ve temlîk ve teslîm ve ben dahi ittihâb ve temellük ve tesellüm eylediğimden mâ‘adâ eyâdî-i nâsda olan bin akçesini ve kefeni içinde mevcûd olan iki altın ve üç guruşunu techîz ve tekfîn ve iskāt-ı salâtına ve sâir vücûh-ı hayrâta harc ve sarfa vasiyyet edip tenfîz-i vasiyyet için beni vasiyy-i muhtâr nasb ve ta‘yîn etmişdir deyû cevâb vermeğin beynimizde münâza‘ât-ı kesîre cereyân etmişidi el-hâletü-hâzihî beynimize muslihûn tavassut edip müteveffâ-yı mezbûre Şerife Huri’nin mezbûr Receb Efendi vaz‘-ı yed eylediği kalîl ü kesîr ve celîl ü hakīr ism-i mâl ıtlâk olunur muhallefâtı ve eyâdî-i nâsda olan mârrü’z-zikr bin akçesi da‘vâsında mezbûr Receb Efendi ile bizi bin nakd-i râyic fi’l-vakt akçe üzerine inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan sâlifü’z-zikr bin akçeyi tamamen merkūm Receb Efendi yedinden asâleten ve vekâletim hasebiyle alıp kabz edip müteveffâ-yı mezbûrenin kabz ve vaz‘-ı yed eylediği mecmû‘-ı muhallefâtını ve eyâdî-i nâsda olan mezbûrü’n-na‘t bin akçesi da‘vâsından mezbûr Receb Efendi’nin zimmetini ibrâ-i âmm-ı kātı‘ü’n-nizâ‘la bi’l-asâle ve bi’l-vekâle ibrâ eyledik min ba‘d merkūm Receb Efendi vechen mine’l-vücûh da‘vâ ve nizâ‘ımız yokdur dediklerinde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’s-sâmin min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, Ahmed Çelebi b. Hasan, Mehmed Çavuş b. Abdullah, Hamza Efendi el-Kadı, Mehmed b. Ahmed, Yusuf b. Abdullah, Mehmed Beşe b. İbrahim, Hüseyin Muhzır, Mehmed b. Mahmud, Dilâver muhzır ve gayruhüm mine’l-hâzırîn.