Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 346 Hüküm no: 359 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Osman’ın menzilini Düğmecibaşı Camii Vakfı ile Hızır Ağa para vakfına bey‘ bi’l-istiğlâl yoluyla satması Sarây-ı cedîd-i sultânî helvacılarından fahrü’l-akrân Mehmed Bey b. Osman nâm kimesne meclis-i şer‘de medîne-i Hazret-i Ebâ Eyyûb el-Ensârî -aleyhi rahmetü’l-Bârî-’de vâki‘ Düğmecibaşı câmi‘-i şerîfi’nin ve Hızır Ağa nâm sâhibü’l-hayrın nukūd-ı mevkūfelerine bi’l-fi‘l mütevellî olan Müderris Mehmed Efendi’nin kāimmakāmı ve mahalle-i mezbûrenin hâlâ imâmı olan Mustafa Efendi b. Ahmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden medîne-i mezbûrede Bıçakçı Ferhad mahallesinde vâki‘ bir tarafdan Bostancı İbrahim mülkü ve tarafdan Şükrü Mehmed oğlu Süleyman mülkü ve bir tarafdan Emir Paşa merhûm vakfı ve bir tarafdan tarîk-i hâs ile mahdûd iki bâb tahtânî oda ve bir sofa ve sokak kapısı ve üzerinde bir bâb oda ve tahtında ahır ve iki kenîfi ve bir su kuyusunu ve dehlizi ve zât-ı eşcâr-ı müsmire ve gayr-ı müsmire bahçeyi müştemil olup mülk-i mevhûbem olan menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık vakfeyn-i mezbûreyn mallarından her biri yedişer dirhem gelir yüz yirmi beş kıt‘a riyâlî guruş-ı kebîre kāimmakām-ı mezbûra alâ tarîki’l-istiğlâl bey‘ edip ol dahi vakfeyn-i mezbûr mallarıyla tarîk-i merkūm üzre iştirâ ve kabûl [ve] semeni olan mezbûrü’n-na‘t yüz yirmi beş kıt‘a riyâlî guruş ki yetmiş kıt‘a riyâlî guruş Düğmecibaşı vakfı’ndan ve elli beş guruşunu dahi mezbûr Hızır Ağa vakfı’ndan olmak üzre cem‘an yüz yirmi beş kıt‘a yedişer dirhem gelir riyâlî guruş kāimmakām-ı mütevellî-i mezbûr merkūm Mustafa Efendi yedinden tamamen alıp kabz eyledikden sonra yine menzil-i mahdûd-ı mezkûru ba‘de’t-tahliyye ve’t-tekābuz târih-i kitâb şehri gurresinden üç sene tamâmına değin her senesi on sekiz kıt‘a riyâlî guruş ve yetmiş akçeden cem‘an elli dört kıt‘a riyâlî guruş ve iki yüz on hurda akçe icâre ile kāimmakām-ı mezbûr bana îcâr ve teslîm, ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’l-mu‘teber mukırr-ı mezbûrun ümm-i uhrevîsi Âsiye Hâtun bt. Hızır Sofu, meclis-i mezbûrda menzil-i mahdûd-ı mezkûru ibn-i uhrevîm mezbûr Mehmed Bey’e ben mukaddemâ hibe eylemişdim hâlâ derk-i menzil-i mezbûre ve ücret-i merkūmeye emr ve kabûlü hâvî kefâlet-i sahîha-i şer‘iyye ile kefîl oldum deyicek men lehü’t-tasdîk kıbelinden ba‘de’l-kabûl mâ cerâ bi’t-taleb kayd şüd. Fi’l-yevmi’l-hâdî ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Efendi kâtib-i Dîvân-ı hümâyûn, Abdurrahman Bey ed-Destârî, Mehmed Çelebi b. Abdülkādir, Mehmed Çelebi Dellâl-i sultânî, Ali Bey b. Mehmed, İbrahim b. ( ) el-Bostânî ve gayruhüm mine’l-hâzırîn.