Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 347 Hüküm no: 360 Orijinal metin no: [79b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Çelebi b. Seyyid İbrahim’in Hasan b. Mehmed’de olan alacağı için kefil istemesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Süleyman Subaşı mahallesi sâkinlerinden bâ‘isü’l-vesîka es-Seyyid Mehmed Çelebi b. es-Seyyid İbrahim nâm kimesne mahfil-i kazâda Hasan b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan elli gün mukaddem vasfı beynimizde ilm-i şer‘î birle ma‘lûm bir çift kara sığır öküzü, mezbûr Hasan’a üç bin iki yüz fıddî râyic-i fi’l-vakt akçeye bey‘ ü teslîm eylediğimde ol dahi minvâl-i muharrer iştirâ ve kabz ve kabûl edip lâkin hîn-i bey‘de ecel-i âtî hulûlünde meblağ-ı mezbûru bana edâ ve teslîme kefîl vermek üzre târih-i mezbûrdan rûz-ı Kasım’a değin meblağ-ı mezbûru te’cîl eylemişdim el-hâletü-hâzihî müşterî-i mezbûr Hasan’dan ber minvâl-i mübeyyen kefîl taleb eylediğimde kefîl vermede te‘allül eder suâl olunup takrîri tahrîr olunmak matlûbumdur deyicek gıbbe’s-suâl mezbûr Hasan cevâbında fi’l-vâki‘ târih-i mezbûrda müdde‘î-i merkūmdan vech-i muharrer üzre üç bin iki yüz akçeye vasfı beynimizde ma‘lûm bir çift kara sığır öküzü iştirâ ve kabz edip hîn-i bey‘[de] meblağ-ı mezbûru te’cîl etmişdir el-hâletü-hâzihî zikr olunan üç bin iki yüz akçe müdde‘î-i mezbûre zimmetinde lâzımü’l-edâ deynimdir deyû ikrâr etmeğin ecel-i mezbûr hulûlünde meblağ-ı mezbûru müdde‘î-i mezbûra edâya kefîl vermek üzre merkūm Hasan’a tenbîh birle mâ hüve’l-vâki‘ bi’t-taleb kayd şüd. Fi’l-yevmi’l-hâdî aşer min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Beşe b. Musli, el-Hâc İvaz Çelebi er-Râcil, Receb Bey b. Maden, Sâlih Efendi b. Mehmed ve gayruhüm mine’l-hâzırîn.