Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 352 Hüküm no: 365 Orijinal metin no: [80b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ali Çelebi’nin harap menzilinin Halil Çelebi b. İbrahim’e satılması Havâss-ı Aliyye kazâsına tâbi‘ Kâğıdhâne nâm karyede sâkin iken bundan akdem vefât eden Ali Çelebi b. Süleyman nâm müteveffânın sulbî sagīr oğlu Süleyman nâm sagīrin tesviye-i umûru için kıbel-i şer‘den mansûb vasî olan üvey babası mefhar-i kuzâti’l-İslâm Nasuh Ağazâde Mehmed Efendi meclis-i şer‘de işbu rafi‘ü’l-kitâb Halil Çelebi b. İbrahim eş-şehîr bi Debbâğzâde mahzarında bi’l-vesâye ikrâr ve takrîr-i kelâm edip hâlâ vasîsi olduğumuz üvey oğlum mezbûr Süleyman’a babası mezbûr Ali Çelebi’den bi’l-irsi’ş-şer‘î isâbet ve intikāl eden emlâkinden karye-i mezbûrede vâki‘ bir tarafdan Hüseyin Beşe b. Abdullah mülkü ve bir tarafdan Ahmed mülkü ve tarafeyni tarîk-i âm ile mahdûd bir bâb fevkānî ve bir bâb tahtânî odaları ve bir ahırı ve su kuyusunu ve zât-ı eşcâr-ı müsmire ve gayr-ı müsmire hadîkayı müştemil mülk-i mevrûs menzili, mürûr-ı eyyâm ve kürûr-ı a‘vâm ile harâb ve mâil-i türâb olup ta‘mîr ve termîme sagīr-i mezbûrun kudreti olmadığından mâ‘adâ sagīr-i mezbûrun nafaka ve kisveye zarûreti olmağla menzil-i mezbûr semen-i misli ile bey‘ ve semeni istirbâh olunup hâsıl olan murâbahası ile sagīr-i mezbûr infâk olunmak her vechile sagīr-i mezbûra enfa‘ olmağın ba‘de’l-müzâyede ve’l-inkıtâ‘i’r-rağbe menzil-i mezbûr merkūm Halil Çelebi üzerinde dört bin akçede karâr edip ziyâde ile tâlib-i âhar zuhûr etmemeğin ben dahi vesâyetim hasebiyle menzil-i mahdûd-ı mezkûru cemî‘-i tevâbi‘ ve levâhıkı ile dört bin fıddî nakd-i râyic-i fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile Halil Çelebi’ye bey‘ ve teslîm, ol dahi ber minvâl-i muharrer iştirâ ve tesellüm ve kabz ve kabûl edip semeni olan mezbûrü’n-na‘t dört bin akçeyi tamamen mezbûr Halil Çelebi yedinden vesâyetim hasebiyle alıp kabz eyledim ba‘de’l-yevm menzil-i mahdûd-ı mezkûr merkūm Halil Çelebi’nin mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber menzil-i mezbûr vech-i muharrer üzre harâb olup ve sagīr-i mezbûrun nafakaya zarûreti olmağla bey‘ olunması sagīre enfa‘ idiğini ve meblağ-ı mezbûr hîn-i bey‘de menzil-i mezbûrun semen-i misli idiğini zeyl-i kitâbda muharrerü’l-esâmî olan müslimîn haber vermeğin mâ cerâ bi’t-taleb ketb olundu. Fi’l-yevmi’t-tâsi‘ aşer min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Efendi el-Kadı, Mehmed Bey b. Hasan, Ali Çelebi b. Mahmud, Hüseyin Muhzır, Eyüb Çelebi b. Mehmed ve gayruhüm mine’l-hâzırîn