Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 353 Hüküm no: 366 Orijinal metin no: [80b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülnûş bt. Abdullah’ın eski kocası Veli Beşe’nin zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Koca Kasım Paşa mahallesi sâkinelerinden Gülnûş bt. Abdullah nâm hâtun meclis-i şer‘-i hatîr-i lâzımü’t-tevkīrde zevci Veli Beşe b. Mehmed nâm kimesne mahzarında bi’t-tav‘ ve’r-rızâ lâ-bi’l-kerh ve’l-cezâ ikrâr ve takrîr-i kelâm edip mezbûr Veli Beşe zevcim olup lâkin hüsn-i zindegânemiz olmamağla beni talâk-ı bâyin ile tatlîk etmeğin mezbûrun zimmetinde mütekarrir olan bin akçe mehr-i müeccel ve nafaka-i iddet ve me’ûnet-i süknâm için beş yüz kırk akçe ve bundan akdem mezbûrun zimmetinde cihet-i deyn-i şer‘îden dahi yedi yüz yirmi akçe ki cem‘an iki bin iki yüz altmış akçe hakkım olup meblağ-ı mezbûr mukābelesinde mezbûr Veli Beşe yedinden bir beledî döşek ve iki beledî yastık ve üç kılıf yastık ve iki yemeni yorgan ve bir köhne seccâde ve bir kilim ve bir beyaz velense ve bir beyaz çarşaf ve bir ihrâm ve üç tencere ve iki sahan ve bir beyaz bohça ve bir alaca peşkir ve bir abdest makrama ve bir ayaklı sandık bana def‘ ve teslîm ben dahi vech-i meşrûh üzre meblağ-ı mezbûr iki bin iki yüz altmış akçe için eşyâ-i mezkûru zevcim mezbûr [81a] Veli Beşe yedinden alıp kabz ve kabûl edip zevciyyete ve deyn-i mezbûre müte‘allik cemî‘ de‘âvî ve mütâlebât ve eymân ve muhâsamâtdan zevcim mezbûr Veli Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d husûs-ı mezbûre müte‘allika vechen mine’l-vücûh da‘vâ ve nizâ‘ım yokdur. Zuhûr dahi ederse lede’l-hükkâmi’l-kirâm makbûle olmasın dedikde mukırra-i mezbûrenin minvâl-i muharrer üzre cârî ve sâdır olan ikrârını mezbûr Veli Beşe bi’l-muvâcehe tasdîk ve ve bi’l-müşâfehe tahkīk etmeğin mâ hüve’l-vâki‘ bi’t-taleb kayd şüd. Fi’l-yevmi’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Ramazan b. İvaz, Ali Beşe b. Hasan, Ali Beşe b. Mehmed, Hasan b. Ahmed, Ali Beşe b. Kasım ve gayruhüm mine’l-hâzırîn.