Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 353 Hüküm no: 367 Orijinal metin no: [81a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Ramazan’ın menzilini bey‘ bi’l-istiğlâl yoluyla İbrahim b. Hacı Yusuf’a satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Evlice Baba mahallesinde sâkin el-Hâc Ali b. Ramazan nâm kimesne meclis-i şer‘de medîne-i mezbûrede sâkin iken bundan akdem vefât eden el-Hâc Yusuf’un sulbî sagīr oğlu İbrahim’in tesviye-i umûru için kıbel-i şer‘den mansûb vasî olan bâ‘isü’l-vesîka Mustafa Çelebi b. Hüdâverdi nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Abdülkerim nâm müezzin mülkü ve bir tarafdan Hüseyin Çelebi ve bir tarafdan Mustafa Çelebi nâm kimesne mülkü ve taraf-ı râbi‘i tarîk-i âm ile mahdûd mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık, vasiyy-i mezbûr Mustafa Çelebi’ye otuz altı kıt‘a esedî guruş ile on iki bin elli akçe ki cem‘an on altı bin üç yüz yetmiş beş [Derkenar:] akçeye alâ tarîki’l-istiğlâl bey‘ edip ol dahi mâl-ı sagīr-i mezbûr ile tarîk-i merkūm üzre iştirâ edip semeni olan mezbûrü’n-na‘t otuz altı kıt‘a esedî guruş ile on iki bin elli beş akçe ki cem‘an on altı bin üç yüz yetmiş beş akçeyi vasiyy-i mezbûr yedinden sagīr-i mezbûr malından olmak üzre tamamen alıp kabz eylediğimden sonra yine menzil-i mahdûd-ı mezkûru vasiyy-i mezbûr târih-i kitâb şehri gurresinden tamâmına değin iki bin dört yüz elli dört akçe icâre ile ba‘de’t-tahliyye ve’t-tekābuz bana îcâr ve teslîm, ben dahi ber minvâl-i muharrer istîcâr ve tesellüm ve kabz ve kabûl eyledim dedikde gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ bi’t-taleb ketb olundu. Fî evâhiri Zilhicceti’l-harâm li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Devletî Mehmed Efendi el-Müderris, Ali Beşe b. Emrullah, Ahmed Efendi el-Kadı, Hasan Muhzır ve gayruhüm mine’l-hâzırîn.