Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 354 Hüküm no: 368 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın daha önceden âzat edilmiş olduğunun tespit edildiği İşbu sâhibetü’l-kitâb uzun boylu, açık kaşlı, kara gözlü, sivri burunlu, sağ gözünün ağında nişânı ve boynunun sağ tarafında hâl-i siyâhı olan Gürciyyetü’l-asl Timurhan bt. Abdullah meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Zeyneb Hâtun mahallesinde sâkin iken bundan akdem fevt olan mevlâsı Mustafa b. Osman’ın bi’l-inhisâr vâriseleri olan zevce-i metrûkesi Ayşe bt. Mehmed ve sulbiye kebîre kızları Emine nâm hâtunlar mahzarlarında üzerlerine takrîr-i da‘vâ edip mevlâm mezbûr fevt olmağla ben bi’l-irsi’ş-şer‘î zevcesi mezbûre Ayşe ile kızı merkūme Emine Hâtun’a isâbet ve intikāl edip lâkin târih-i kitâb Şa‘bânü’l-mu‘azzamı selhinden mezbûretân Ayşe ve Emine beni mevlâm müteveffâ-yı mezbûrun tabutuna çevirip huzûr-ı müslimînde mallarından âzâd eylediklerinden mâ‘adâ mezbûr[e] Emine, Ahmed Çelebi nâm kimesneye nikâh olunduğu meclisde dahi müslümanlar huzûrunda beni minvâl-i muharrer üzre i‘tâk eylediklerini ikrâr ve işhâd dahi etmişlerken hâlâ bana rık olmak üzre vaz‘-ı yed murâd ederler suâl olunup yedleri kasr ve sebîlim tahliyye olunmak murâdımdır deyicek gıbbe’s-suâl ve akībe’l-inkâr müdde‘iye-i mezbûre Timurhan’dan müdde‘âsını mübeyyine beyyine taleb olundukda, udûl-i ricâlden olup mezbûre Emine’nin li ebeveyn ammisi olan Ömer b. Osman ve mahalle-i mezbûre müezzini olan Mustafa Halîfe b. Abdülkādir ve diğer Mustafa b. Süleyman ve diğer Mustafa b. Yusuf ve Hasan b. Allahverdi ve İsmail b. Şaban ve İbrahim b. Hüdâverdi ve Ali Çelebi b. Mehmed nâm kimesneler li ecli’ş-şehâde makām-ı kazâya hâzırûn olup istişhâd olunduklarında, fi’l-vâki‘ işbu târih-i kitâb Şa‘bânü’l-mu‘azzamı selhinden mezbûretân Ayşe ve Emine bizim huzûrumuzda müdde‘iye-i mezbûreyi mûrisleri müteveffâ-yı mezbûrun tabutuna çevirip mallarından âzâd ve bizi işhâd eylediklerinden mâ‘adâ mezbûre Emine nikâh olunduğu meclisde yine mezbûretân Ayşe ve Emine mûrisimiz müteveffâ-yı mezbûrdan irsen bize intikāl eden işbu Timurhan nâm câriyemizi mukaddemâ mûrisimiz müteveffâ-yı mezbûrun tabutu üzerinde âzâd eylemişdik yine malımızdan âzâd olsun üzerinde hakk-ı velâdan gayrı hakkımız kalmamışdır siz şâhid olun deyû tekrâr ikrâr ve bizi işhâd eylemişlerdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mezbûretân Ayşe ve Emine meclis-i mezbûrda fi’l-vâki‘ mezbûre Timurhan’ı minvâl-i muharrer üzre i‘tâk eylemişdik lâkin bize âsiye olmağın ıtkımızdan rücû‘ eyledik bey‘ ederiz deyû mukaddemâ ıtklarını tav‘an ikrâr ve i‘tirâf edip mezbûretânın rücû‘ları câiz ve meşrû‘ olmamağın mezbûre Timurhan’ın ıtkına hükm ve mezbûretânın kasr-ı yedlerine beyyine birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Ali Çelebi b. Halil el-Yesârî, Eyüb Çelebi b. Mehmed, el-Hâc Eyüb b. Süleyman, Mehmed Beşe b. Musli, Ali Beşe b. Emrullah, Mehmed b. Abdullah, Mehmed b. Mahmud, Dilâver b. Abdullah, Hasan b. Abdullah, Hüseyin b. Hasan ve gayruhüm mine’l-hâzırîn.