Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 355 Hüküm no: 369 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Başka bir yerde ikamet eden İspero’nun hissesine düşen örfî vergi borcunu ödemesi ve kardeşlerinin kefil olması Vilâyet-i Rumeli’nde Avlonya sancağına tâbi‘ Ergirikasrı kazâsı a‘mâlinden Lukşan nâm karye zimmîlerinden Dimo v. Kiko ve Andriye v. Dado ve Dado v. Halye ve Piranto v. Sava ve Dado v. Goka ve Kosta v. Petro ve Drako v. İstatyo nâm zimmîler ve sâirleri bi ecma‘ihim meclis-i şer‘de her biri takrîr-i kelâm ve ifâde-i merâm edip mukaddemâ karye-i mezbûreden olup hâlâ vilâyet-i mezbûrede medîne-i İpsala’da mütemekkin olan İspiro v. Vasil nâm zimmî zimmetinde bâkī on seneden beri karye-i mezbûre ahâlîsine vâki‘ olan tekâlîf-i örfiyye ve şâkkadan hissesine düşen yedi bin beş yüz akçeyi merkūm İspiro’dan taleb ve da‘vâ ve ahz ü kabz ve bize îsâle ve inde’l-hâce lede’l-hükkâmi’l-kirâm mürâfa‘a ve muhâsamaya ve kabz ve îsâl mütevakkıf olduğu umûrun küllîsine yine merkūm İspiro’nun li ebeveyn karındaşı Köni v. Vasil ve Doli v. Halye nâm zimmîleri tarafımızdan vekîl ve nâib-i menâb nasb ve ta‘yîn eyledik ba‘de’l-yevm merkūm İspiro sene-be-sene karye-i mezbûre taraf-ı Saltanat-ı aliyye’den vâki‘ olan tekâlîf-i örfiyye ve şâkkadan kendi hissesine isâbet eden meblağ için dörder yüz akçe bi’r-rızâ bize irsâl ve îsâl ederse min ba‘d merkūm İspiro ile da‘vâ ve ve nizâ‘ımız yokdur vekîlimiz mezbûrân Köni ve Doli merkūma hüccet versinler dediklerinde merkūmân Köni ve Doli dahi vekâlet-i mezbûreyi kabûl ve mukaddemât-ı lâzımesini edâya müte‘ahhid olduklarında, vâki‘ü’l-hâl hıfzen li’l-makāl bi’t-taleb kayd şüd. Fi’l-yevmi’l-hâmis ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Çelebi b. Musli, Dilâver b. Abdullah, Hüseyin b. Hasan Muhzır, Mehmed b. Mahmud ve gayruhüm mine’l-hâzırîn.