Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 356 Hüküm no: 370 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Kiro’nun bağını Asım Ahmed Çelebi para vakfına satması (bey‘ bi’l-istiğlâl) Havâss-ı Aliyye kazâsına tâbi‘ Avasya nâm karye sâkinlerinden Dimo v. Kiro nâm zimmî meclis-i şer‘de medîne-i Hazret-i Ebâ Eyyûb el-Ensârî’de merhûm Âsım Ahmed Çelebi[’nin] vakf eylediği nukūda bi’l-fi‘l mütevellî olan bâ‘isü’l-kitâb Davud Efendi b. Mehmed mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden karye-i mezbûrede vâki‘ iki tarafdan Kaçavla bağı ve bir tarafdan sâbıkan Tanaş nâm zimmî mâlik olduğu bağ ve bir tarafdan Osman tarlasıyla mahdûd tahmînen iki buçuk dönüm bir kıt‘a mülk bağımı mâl-ı vakf-ı mezbûr ile tarîk-i merkūm üzre iştirâ edip kabz [ve] semen-i ma‘dûd ve teslîm-i mebî‘-i mahdûd kıldığımdan sonra yine bağ-ı mahdûd-ı mezkûru bin yetmiş üç Muharremü’l-harâmı gurresinden tamâmına değin yüz otuz beş akçe icâre ile mütevellî-i mezbûr bana îcâr ve teslîm, ben dahi minvâl-i muharrer üzre istîcâr ve tesellüm ve kabz ve kabûl eyledim dedikde mukırr-ı mezbûru ikrâr-ı meşrûhunda el-mukarru lehü’l-mezbûr Mütevellî Davud Efendi vechen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fî evâhiri Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Çelebi b. Veli, Mehmed Çelebi b. Musli, Mehmed Çelebi b. Mahmud, Ali Beşe b. ( ) Kalaycı, Hüseyin Bey el-Muhtesib ve gayruhüm mine’l-hâzırîn.