Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 357 Hüküm no: 371 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacca gittiği için mütevellilikten ayrılan Receb Halife’nin Çelebi Mescidi para vakfına olan borcuna babası Ali Beşe’nin kefil olması Mahmiye-i İstanbul hısnı ebvâbından Yenikapı hâricinde merhûm Emânî Çelebi Mescid-i şerîfi nukūd-ı mevkūfesine bi’l-fi‘l mütevellî olan bâ‘isü’l-kitâb Abdülaziz Çelebi b. Sinan meclis-i şer‘de sâbıkan evkāf-ı şerîfe mütevellîsi olup hâlâ azl olunan Receb Halîfe’nin babası Ali Beşe b. Abdullah mahzarında bi’l-velâye üzerine takrîr-i da‘vâ edip mezbûr Ali Beşe’nin oğlu olup bundan akdem evkāf-ı mezbûre mütevellîsi olan mezbûr Receb Halîfe bilâ-izn-i şer‘î hacc-ı şerîfe gidip yerine kāimmakām nasb etmekle umûr-ı vakf muhtel ve müşevveş olmağın tevliyyet-i mezbûre berât-ı pâdişâhî ile bana tevcîh olunup ben dahi defter-i muhâsebe mûcebince mâl-ı vakf-ı mezbûru erbâb-ı zimemden yoklayıp defter eylediğimde erbâb-ı zimemle her bir tâmmü’l-vezn riyâlî guruş sekiz akçeye olmak üzre otuz dokuz bin akçe bulunup meblağ-ı mezbûrun dahi üç bin akçesi hurda akçe ve Hüseyin Efendi zimmetinde on beş guruş ve müezzin zimmetinde on iki buçuk guruşu bilâ-rehin olup ve bâkī yirmi üç bin akçenin dahi iki bin beş yüz akçesi hurda mâ‘adâsı yedişer dirhem guruş yüzer akçe hesâbı üzre bulunup onun dahi müezzin zimmetinde on yedişer dirhem on guruşu bilâ-rehin olmağın ben dahi zikr olunan zimemi kabûlde mütereddid iken mütevellî-i sâbık mezbûr Receb Halîfe’nin babası mezbûr Ali Beşe, mâl-ı vakf-ı mezbûrdan oğlum zimmetinde zuhûr eden malı vakfa edâ ve teslîme ben kefîlim deyû ben dahi ahâlî-i mahalle-i mezbûrenin küllîsini ve mezbûr Ali Beşe’yi meclis-i şer‘a ihzâr ve husûs-ı mezbûru merkūm Ali Beşe’den da‘vâ eylediğimde mezbûr Ali Beşe kefâleti ikrâr, lâkin oğlum mezbûr Receb Halîfe’ye mâl-ı vakf-ı mezbûr ne minvâl üzre teslîm olunmuşdur ma‘lûmum değildir deyicek ahâlî-i mahalle-i mezbûre meclis-i şer‘de merkūm Ali Beşe mahzarlarında mâl-ı vakf-ı mezbûrun her on iki buçuk tâmmü’l-vezn riyâlî guruş bin akçe hesâbı üzre oğlun mezbûr Receb Halîfe’ye cem‘an altmış iki bin cedîd akçe teslîm olunmuşdur deyû haber verdiklerinde mâl-ı vakf-ı mezbûr hesâb ve kitâb olunup elli yedi buçuk riyâlî guruş ile beş bin yedi yüz kırk akçe kesr guruşun bi hesâb-ı hurda on bir bin dört yüz doksan akçe mütevellî-i mezbûr Receb Halîfe zimmetinde zuhûr etmişdir hâlâ babası kefîl-i mezbûrdan suâl olunup takrîri tahrîr olunmak matlûbumdur deyicek gıbbe’s-suâl mezbûr Ali Beşe cevâbında fi’l-vâki‘ hesâb-ı mezbûr benim muvâcehemde olmuşdur, eğer oğlum sıhhat ile gelip mâl-ı vakfı hesâb-ı mezbûr üzre edâ ederse fe-bihâ ve emr-i Hakk olup fevt olursa, meblağ-ı mezbûru vakfa edâya ben kefîlim deyû tav‘an ikrâr etmeğin mâ cerâ kayd şüd. Fî evâhiri Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Şaban Efendi imâm-ı Takyeci, Mehmed Halîfe imâm-ı Emânî, Mehmed Çelebi kâtib-i vakf, Mehmed Çelebi el-Müezzin, Ali Halîfe imâm-ı Sâlih Çelebi, Mehmed Çelebi b. Musli ve gayruhüm mine’l-hâzırîn.