Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 358 Hüküm no: 373 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçtıktan sonra yakalanan Rus köleye nafaka takdir edilmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de hâlâ zâbitü’l-vakt olan bâ‘isü’l-vesîka fahrü’l-akrân Seyfullah Ağa b. Ramazan meclis-i şer‘a uzun boylu, çatık kaşlı, yassı yüzlü, sarı bıyıklı, sarışın rık ve ibâkını mu‘terif Rûsiyyü’l-asl Yusuf b. Abdullah nâm gulâm-ı âbık-ı emredi ihzâr ve muvâcehesinde takrîr-i kelâm edip işbu târih-i kitâb günü mezbûr Yusuf’[u] mahmiye-i İstanbul hısnı ebvâbından Eğrikapı hâricinde Halil Beşe ve Osman Beşe nâm kimesneler firâr ederken ahz ve müjdegânesini alıp bana teslîm eylediklerinde ben dahi ahz ve ihzâr-ı şer‘-i şerîf eylemişimdir hâlâ suâl olunup sâhibi zuhûr edinceye [kadar] kadr-i ma‘rûf nafaka farz ve takdîr olunmak matlûbumdur deyicek mezbûr Yusuf’dan suâl [olundukda], rık ve ibâkını meclis-i şer‘de tav‘an ikrâr ve i‘tirâf etmeğin hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi merkūm Yusuf’a târih-i kitâbdan beher yevm sekiz akçe nafaka farz ve takdîr ve inde’z-zarûre istidâne ve lede’z-zafer sâhibi olan kimesneye rücû‘a zâbit-i mezbûre izin verildiğinden sonra gulâm-ı mevsûf-ı mezkûru sâhibi zuhûr edince[ye kadar] hıfz u hırâsete tenbîh birle mâ hüve’l-vâki‘ kayd şüd. Fi’l-yevmi’l-hâmis ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Umdetü’l-emâcid ve’l-ekârim Mehmed Efendi Arpa emîni hâlâ, Nasuh Çelebi tâbi‘-i mezbûr, Ahmed Bey b. Mehmed tâbi‘-i mezbûr, Mehmed Efendi b. Hasan ve gayruhüm mine’l-hâzırîn