Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 359 Hüküm no: 374 Orijinal metin no: [82a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Hacı Receb’in evine, bitişiğindeki vakıf evin saçağının değmesi üzerine yapılan keşif Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Şah Sultan mahallesi sâkinlerinden umdetü’l-kuzâti’l-İslâm, zübdetü vülâti’l-enâm sâhibü’l-kitâb Mustafa Efendi b. el-merhûm el-Hâc Receb meclis-i şer‘-i şerîf-i lâzımü’t-teşrîfde takrîr-i kelâm ve ta‘bîr ani’l-merâm edip mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilime muttasıl olan menzili bundan akdem Ali Çavuş nâm sâhibü’l-hayr vakf ve haps ve tevliyyet ve süknâsını kendiden sonra hâlâ menzil-i mezbûrda sâkin olan Hasan b. Abdullah nâm kimesneye ba‘dehû zevcesine ba‘dehâ evlâdlarına ve evlâd-ı evlâdlarına ba‘dehüm ulemâya şart ve ta‘yîn eylediği menzilin benim menzilime muttasıl tahtânî odasının ocağı tarafının saçağı bir zirâ‘dan ziyâde benim menzilime girdiğinden mâ‘adâ damlası benim menzilimin havlusuna cereyân etmekle menzilime küllî zararı vardır, menzil-i vakf-ı mezbûrda hâlâ meşrûtiyyet üzre sâkin olan mezbûr Hasan Beşe’ye zarar-ı mezkûru def‘ eyle deyince def‘a tenbîh eylediğimde inâd etmeğin kıbel-i şer‘den üzerine nâib ve mi‘mâr irsâl olunup zarar-ı mezkûrun def‘ olunmasın taleb ederin deyicek savb-ı şer‘den mevlânâ Sâlih Mehmed Efendi b. Mehmed ve hâssa mi‘mârlarından Üstâd Ali Beşe b. Abdullah ve zeyl-i kitâbda muharrerü’l-esâmî olan müslimîn irsâl olunup mahall-i mezbûra varıp nazar eylediklerinde mi‘mâr-ı mezbûr misâha ve takvîm etmeğin fi’l-vâki‘ mezbûr Hasan Beşe’nin menzilinde vâki‘ tahtânî odanın ocağı tarafında olan saçak bir zirâ‘ mikdârı mezbûr Mustafa Efendi’nin menziline girmekle kal‘ lâzım ve tûlen yedi zirâ‘ oluk ile damlasını kendi menziline cereyân ettirmekle mezbûr Mustafa Efendi’nin zararı mündefi‘ olur ve lâkin mezbûr Mustafa Efendi dahi kendi saçağına tûlen on üç zirâ‘ oluk vaz‘ eylemek lâzımdır deyû haber verdiklerinden sonra mezbûr Hasan Beşe meclis-i mezbûrda merkūm Mustafa Efendi mahzarında üzerine takrîr-i da‘vâ edip mezbûr Mustafa Efendi hâlâ binâ eylediği odasının benden tarafa olan duvarını dört parmak mikdârı benim menzilim dâhilinde olan mezaristan sofası temeli üzerine ihrâc eylemişdir nazar olunsun deyicek nazar olundukda, mezbûr Mustafa Efendi’nin binâ eylediği duvar ile mezbûr Hasan Beşe’nin menzili duvarı beyninde bir karış mikdârı fâsıla olduğundan mâ‘adâ duvar-ı mezbûr vaz‘-ı kadîm üzredir hattâ kadîmü’l-eyyâmdan işbu duvarda mezaristana açılır pencereler dahi var idi deyû mahalle-i mezbûreden Müezzin Ahmed Efendi b. Mehmed ve Mahmud Beşe b. Yusuf nâm müsin ve ihtiyâr kimesneler alâ tariki’ş-şehâde haber verdiklerinde vâki‘ü’l-hâli mevlânâ-yı mezbûr mahallinde tahrîr, ba‘dehû ma‘an irsâl olunan mevlânâ Hamza ile gelip meclis-i şer‘a alâ vukū‘ihî inhâ ve takrîr eylediklerinde zikr olunan saçağı kal‘ ve yedi zirâ‘[82b] oluk ile