Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 360 Hüküm no: 375 Orijinal metin no: [82b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacer bt. Ahmed’in vakıf davasında Ahmed Beşe b. Abdülbâki’yi vekil tayin etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Takyecibaşı mahallesinde sâkin fahrü’l-akrân râfi‘ü’l-kitâb Ahmed Beşe b. Abdülbâkī nâm kimesneden vech-i âtî üzre istişhâd-ı şer‘î sudûrundan sonra mahalle-i mezbûre imâmı Receb Efendi b. Yusuf ve Mehmed Çelebi b. Abdülaziz el-Müezzin meclis-i şer‘a li ecli’ş-şehâde hâzırân olup her biri edâ-i şehâdet-i şer‘iyye edip mahall-i mezkûre sâkinelerinden Hacer bt. Ahmed, mahalle-i mezbûrede vâki‘ lede’l-ahâlî ve’l-cîrân ma‘lûmetü’l-hudûd vakıf menzilden ber mûceb-i şart-ı vâkıf kendiye isâbet eden hisse-i şer‘iyye-i şâyi‘asını hâlâ menzil-i mezbûre vâzı‘atü’l-yed olan vâlidesinden taleb ve da‘vâ ve inde’l-hükkâmi’l-kirâm mürâfa‘a ve muhâsamaya bizim huzûrumuzda mezbûre Hacer Hâtun, merkūm Ahmed Beşe’yi tarafından vekîl ve nefsi için nâib-i menâb nasb ve ta‘yîn edip ol dahi vech-i muharrer üzre vekâlet-i mezbûreyi kabûl ve hıdemât-ı lâzımesini edâya müte‘ahhid ve iltizâm etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın vâki‘ü’l-hâl vekîl-i mezbûr Ahmed Beşe talebiyle bi’l-ibtigā kayd şüd. Fi’l-yevmi’l-hâmis ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-kuzât Hamza Efendi nâib-i recül, çukadâr Mehmed Beşe b. Musli, Hasan Çelebi b. Hasan, Mehmed Çelebi b. Hasan ve gayruhüm mine’l-hâzırîn.