Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 361 Hüküm no: 376 Orijinal metin no: [82b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi ustası Sefer v. Şamlı’nın tezgâhtarından alacağı olması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Bardakçılar sûkunda vâki‘ ekmekçi fırınının üstâdı râfi‘ü’l-vesîka Sefer v. Şamlı nâm Ermeni mahfil-i kazâda yine fırın-ı mezbûrda destgâhdârı olan Garbid v. Yıla nâm Ermeni muvâcehesinde üzerine da‘vâ ve takrîr-i kelâm edip merkūm Garbid fırın-ı mezbûr destgâhdârım olup hâlâ üstâdlar beyninde mezbûr ile hesâb ve kitâb eylediğimizde cihet-i sermâyeden merkūm Garbid zimmetinde otuz sekiz bin akçe hakkım zuhûr edip meblağ-ı mezbûrun dört bin akçesini emrim ile gāib ani’l-meclis Navluncu Osman nâm kimesneye def‘ ü teslîm ve dokuz bin akçesini dahi nakd[en] yedime def‘ ve teslîm edip bâkī yirmi beş bin akçemi taleb eylediğimde teslîmden imtinâ‘ edip te‘allül eder suâl olunup alıverilmek matlubumdur deyicek gıbbe’s-suâl mersûm Garbid cevâbında fi’l-hakīka hâl bâlâda bast ve tahrîr olunduğu üzre olup cihet-i sermâyeden müdde‘î-i mezbûrun zimmetinde ba‘de külli hesâb yirmi beş bin akçesi bâkī kalmışdır zikr olunan yirmi beş bin akçeyi müdde‘î-i merkūma zimmetimde lâzımü’l-edâ ve vâcibü’l-kazâ deynimdir deyû bi tav‘ihî ikrâr ve i‘tirâf edicek alâ mûcebi ikrârihî meblağ-ı mezbûru müdde‘î-i mezbûra edâ ve teslîm ile mezbûr Garbid ilzâm olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Zilhicceti’ş-şerîfe li sene isneteyn ve elf. Şuhûdü’l-hâl: Musli Çelebi b. Hasan, kâğıdcı Mustafa Çelebi b. Hasan, Mehmed Çelebi b. Musli, Mehmed b. Abdullah, Dilâver b. Abdullah, Hasan b. Abdullah ve gayruhüm mine’l-hâzırîn.