Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 362 Hüküm no: 377 Orijinal metin no: [82b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Güllü bt. Musa’nın eski kocası Veli b. Mehmed’in zimmetini ibrâ etmesi Medîne-i Hazret-i Ebâ Eyyûb el-Ensârî’de vâki‘ Takyecibaşı mahallesi sâkinelerinden Güllü bt. Musa nâm hâtun meclis-i şerî‘at-ı şerîfede zevc-i mutallıkı işbu râfi‘ü’l-kitâb Veli b. Mehmed nâm kimesne mahzarında bi tav‘ihî ikrâr-ı tâm ve takrîr-i kelâm kelâm edip mezbûr Veli zevcim olup bundan akdem beni talâk-ı selâse ile tatlîk eyledikde mezbûrun zimmetinde mütekarrir olan dört yüz akçe mehr-i müeccelim ve nafaka-i iddet ve me’ûnet-i süknâm mukābelesinde olan üç yüz altmış akçe ki cem‘an yedi yüz altmış akçe hakkım mezbûrun zimmetinde kalmış idi el-hâletü-hâzihî dört yüz akçe mehr-i müeccelim ve nafaka-i iddet ve me’ûnet-i süknâm için tahrîr olunduğu minvâl üzre cem‘an yedi yüz altmış akçe hakkımı mezbûr Veli yedinden tamamen ahz ü kabz edip zevciyyete müte‘allika âmme-i de‘âvî ve mütâlebâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm mezbûr Veli ile minvâl-i mübeyyen üzre mehr-i müeccel ve nafaka ve iddet ve me’ûnet-i süknâya müte‘allik vechen mine’l-vücûh da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın dedikde mukırra-i mezbûrenin vech-i meşrûh üzre cereyân eden cemî‘-i ikrârını mezbûr Veli vicâhen ve şifâhen tasdîk ve tahkīk etmeğin mâ cerâ bi’t-taleb kayd şüd. Fi’l-yevmi’s-sâmin ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-kuzât Mustafa Efendi b. İsmail, Halil Çelebi b. İbrahim, Hamza Efendi nâib-i recül, Mehmed Çelebi b. Ahmed ve gayruhüm mine’l-hâzırîn.