Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 362 Hüküm no: 378 Orijinal metin no: [83a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri’nin oğulları Panayot ile Todor’un alacak hususunda Polihroni v. Panayot’un zimmetini ibrâ ettikleri Vilâyet-i Rumeli’nde Mizistre kazâsına tâbi‘ Nehor? nâm karye sükkânından Panayot ve Todor veledey Dimitri nâm zimmîler meclis-i şerî‘at-ı şerîfede bostancı tâifesinden işbu râfi‘ü’l-sifri’ş-şer‘î Polihroni v. Panayot nâm zimmî muvâcehesinde herbiri ikrâr-ı tâm ve takrîr-i kelâm edip işbu târih-i kitâbdan dokuz ay mukaddem beyaz kîse ile alâ tarîki’l-vedî‘a mezbûr Polihroni yedine elli iki bin akçemizi def‘ ü teslîm eylediğimizde ol dahi minvâl-i muharrer üzre kabz ve tesellüm eylemiş idi el-hâletü-hâzihî sâlifü’z-zikr beyaz kîse ile mârrü’z-zikr elli iki bin akçeyi bi’t-tamâm ve’l-kemâl mezbûr Polihroni yedinden alıp kabz edip meblağ-ı mezbûr elli iki bin akçeye müte‘allik âmme-i de‘âvî ve mütâlebât ve eymân ve muhâsamâtdan merkūm Polihroni’nin zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm birle iskāt eyledik min ba‘d meblağ-ı mezbûra müte‘allik vechen mine’l-vücûh da‘vâ ve nizâ‘ımız yokdur dediklerinde mukırrân-ı mezbûrânın vech-i meşrûh üzre cârî ve sâdır olan cemî‘-i ikrârların merkūm Polihroni bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ gıbbe’t-taleb kayd şüd. Fi’l-yevmi’s-sâmin ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Receb Beşe b. Abdullah, Hasan Beşe b. Abdullah, Hüseyin Beşe b. Veli, çukadâr Mehmed Çelebi ve gayruhüm mine’l-hâzırîn.