Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 363 Hüküm no: 379 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdi Paşa’nın alacak hususunda Dador v. Matok’un zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Düğmecibaşı mahallesinde sâkin iken bundan akdem fevt olan Abdi Paşa nâm müteveffânın verâseti, sulbî sagīr oğlu Mehmed’e münhasır olduğu şer‘an zâhir ve müte‘ayyin oldukdan sonra sagīr-i mezbûrun tesviye-i umûru için kıbel-i şer‘den mansûb vasî olan Şaban b. Hasan nâm vasî meclis-i şer‘de bostancı tâifesinden olup müteveffâ-yı mezbûrun san‘at-ı mezbûrede şerîki olan râfi‘ü’l-vesîka Dador v. Matok nâm Ermeni muvâcehesinde bi’l-vesâye ikrâr ve takrîr-i kelâm edip müteveffâ-yı mezbûrun merkūm Dador zimmetinde cihet-i şer‘den dokuz bin akçesi olup kable’l-ahz fevt olmağla meblağ-ı mezbûr dokuz [bin] akçe bi hasebi’l-irsi’ş-şer‘î sulbü mezbûr Mehmed’e isâbet ve intikāl etmeğin meblağ-ı mezbûru târih-i kitâbdan on bir ay mukaddem mezbûr Dador sagīr-i mezbûr Mehmed için bana def‘ ü teslîm etmeğin ben dahi târih-i mezbûrda mârrü’z-zikr dokuz bin akçeyi merkūm Dador yedinden sagīr-i mezbûr Mehmed için bi’l-vesâye alıp meblağ-ı mezbûr dokuz bin akçe da‘vâsından merkūm Dador zimmetini bi’l-vesâye ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d husûs-ı mezbûra müte‘allik vechen mine’l-vücûh da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm istimâ‘ olunmaya deyicek vasiyy-i mezbûr Şaban’ın vech-i meşrûh üzre cârî ve sâdır olan ikrârın merkūm Dador Ermeni vicâhen ve şifâhen tasd[îk] ve tahkīk etmeğin mâ cerâ kayd şüd. Fî gurreti şehri Muharremi’l-harâm li sene selâse ve seb‘în ve elf. Şuhûdü’l-hâl: Musa Beşe b. Abdullah, Murad Beşe b. Abdullah, Hüseyin Beşe b. Abdullah, Kerim Çelebi b. ( ) Bahçevân, el-Hâc Ebûbekir b. Abdullah, Musa Bey b. Mustafa, Mehmed Bey b. Abdullah ve gayruhüm mine’l-hâzırîn.