Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 364 Hüküm no: 380 Orijinal metin no: [83a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüfek kurşunuyla vurulan Nesli bt. Mustafa’nın diyeti hususunda kocasının Peroliç köyü halkından herhangi bir davası olmadığı Katîle-i âtiyyetü’z-zikri mahallinde keşf ve tahrîr için bi’t-taleb irsâl olunan mevlânâ Eyüb Efendi b. Mehmed zeyl-i kitâbda muharrerü’l-esâmî olan müslimîn ile Havâss-ı Aliyye kazâsına tâbi‘ Peroliçe nâm karye sınırı dâhilinde vâki‘ Soğukpınar nâm mahalle varıp akd-i meclis-i şer‘ eylediğinde göçer evli Kıbtiyân tâifesinden olup târih-i kitâb gecesi mecrûhaten müteveffiye olan Nesli bt. Mustafa nâm Kıbtiyenin zevci Ali b. Dede Bâli meclis-i ma‘kūd-ı mezkûrda mârrü’z-zikr Peroliç karyesi ahâlîsinden Ahmed Ağa b. Mustafa ve Mehmed Beşe b. Abdullah ve Hüseyin b. Abdullah ve Hüseyin b. Mehmed ve Mustafa b. Hüseyin ve Hasan b. Halil ve sâirleri mahzarlarında bi’t-tav‘i’s-sâf ikrâr ve i‘tirâf edip târih-i kitâb gecesi ben zevcem ile işbu mahalde mezbûre Nesli ile çergem içinde yatarken bir haramzâde gelip çergem önünde merbût olan kısrağımı serika etmek murâd edip ben dahi âgâh olup feryâd ederek taşra çıktığımda merkūm haramzâde üzerime tüfenk atıp bi emrillâh kurşun zevcem mezbûrenin sol memesi üzerine rast gelip ol cerâhatden fevt olmuşdur el-hâletü hâzihî zevcem mezbûrenin dem ve diyetine müte‘allik ahâlî-i karyeden bir ferd ile da‘vâ ve nizâ‘ım yokdur deyicek ahâlî-i karye-i mezbûre talebleriyle mukırr-ı mezbûrun ikrâr ve takrîrin mahallinde ketb ve tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin vâki‘ü’l-hâl bi’t-taleb ketb olundu. Fi’l-yevmi’s-sâmin ve’l-ışrîn min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Beşe b. Bayram, Hüseyin Beşe b. Hasan, Ramazan Efendi b. Hüseyin, Mehmed Beşe b. Mahmud, Hüseyin Beşe b. Mehmed ve gayruhüm mine’l-hâzırîn.