Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 364 Hüküm no: 381 Orijinal metin no: [83a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Danyal v. Asvador’un Sefer v. Şişko’ya olan borcunu ödemesi Tülbentçi tâifesinden Danyal v. Asvador nâm Ermeni meclis-i şer‘de habbâz tâifesinden işbu râfi‘ü’s-sifr Sefer v. Şişko nâm Ermeni muvâcehesinde ikrâr ve takrîr-i kelâm edip bundan akdem merkūm Sefer yedinden dokuz bin beş yüz fıddî nakd-i râyic fi’l-vakt akçe istikrâz ve kabz edip mukābelesinde merkūm Sefer yedine kehribâdan masnû‘ bir sagīr sandık rehin vaz‘ ve teslîm, ol dahi irtihân ve tesellüm ve kabz etmişdi el-hâletü hâzihî kehribâ sandığımı merkūm Sefer yedinden ahz ü kabz edip lâkin meblağ-ı mezbûru hâlâ edâ ve teslîme iktidârım olmamağla târih-i kitâbdan on beş gün tamâmına değin edâ ve teslîme ta‘ahhüd ve iltizâm eylemişimdir deyû tav‘an i‘tirâf edicek merkūm Sefer dahi zikr olunan dokuz bin beş yüz akçeyi ber minvâl-i muharrer te’cîl ve mukırr-ı merkūmu kelimât-ı meşrûsunda vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb kayd şüd. Fî gurreti Muharremi’l-harâm li sene selâse ve seb‘în ve elf. Şuhûdü’l-hâl: Muharrir-i makāl Mehmed Efendi b. Hasan Efendi, Ahmed Beşe b. Resul, Mehmed Çelebi b. Ahmed, Mehmed Beşe b. Musli, Hüseyin el-Muhzır, Hasan el-Muhzır ve gayruhüm mine’l-hâzırîn.