Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 365 Hüküm no: 382 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. III. Murad’ın kızı Fahrî Sultan’ın para vakfına mütevelli olan kâtib Mehmed’in eski mütevellisiyle hesaplaşıp anlaştıkları Umdetü’l-muhadderât zübdetü’l-muvakkarât tâcü’l-mestûrât hazret-i Fahrî Sultan bt. el-merhûmü’l-mağfûr ilâ rahmeti Rabbihi’l-gafûr Sultan Murad Hân -tâbe serâhu- hazretlerinin vakf [ve] haps eylediği nukūd-ı câ’i’z-zikre cânib-i şer‘de Sultân-ı müşârün-ileyhânın re’y-i şerîfleri ile mütevellî nasb ve ta‘yîn olunan fahrü’l-a‘yân kâtib Mehmed Efendi b. Veli nâm kimesne meclis-i şer‘-i hatîr-i lâzımü’t-ta‘zîmde sâbıkan meşrûtiyyet üzre vakf-ı mezbûre mütevellî olan fahrü’l-emâcid ve’l-e‘âlî -dâme mahfûfen bi’l-me‘âlî- Süleyman Bey b. el-merhûm Davud Paşa mahzarında ikrâr-ı tâmm ve takrîr-i kelâm edip bundan esbak Sultân-ı müşârün-ileyhâ vakf ve haps edip tevliyyetini mûmâ-ileyh Süleyman Bey’e şart ve ta‘yîn buyurdukları bin kıt‘a tâmmü’l-vezn [ve] sahîhü’l-ayâr riyâlî kebîr guruşu i‘mâl ve irbâhda mûmâ-ileyh Süleyman Bey’in aczi olmağla kendi rızâ ve hüsn-i ihtiyârıyla tevliyyet-i mezbûreden kasr-ı yed etmekle tevliyyet-i mezbûre vazîfe-i mu‘ayyenesiyle taraf-ı şer‘den bana tevcîh olunmağın ben dahi tevliyyet hasebiyle huzûr-ı hâkimü’ş-şer‘de mûmâ-ileyh Süleyman Bey’in muhâsebesin görüp bâlâda zikr olunan bin kıt‘a tâmmü’l-vezn [ve] sahîhü’l-ayâr riyâlî kebîr guruş asl-ı mâl-ı mezbûru bana meclis-i şer‘de def‘ ü teslîm, ben dahi bi’t-tevliyye kabûl ve kabz edip ba‘de’l-yevm mûmâ-ileyh Süleyman Bey zimmetinde mâl-ı vakf-ı mezbûrun asıl ve fer‘inden bir akçe ve bir habbe bâkī kalmayıp husûs-ı mezbûrdan zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm birle ibrâ ve iskāt eyledim dedikde mütevellî-i mezbûr Mehmed Efendi’nin minvâl-i muharrer üzre cereyân eden cemî‘ ikrârın mûmâ-ileyh Süleyman Bey bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ ve’l-ışrîn min Zilhicceti’ş-şerîfe sene 1072. Şuhûdü’l-hâl: Mustafa Efendi b. Hasan Çavuş, Mehmed Bey b. Receb, Ali Efendi b. Mehmed, Mehmed Bey b. Ahmed, Mahmud Çelebi b. Ali, Halil Beşe b. Mehmed, İbrahim Çelebi b. Yakub, Receb Bey b. Maden, Ahmed b. Mustafa ve gayruhüm mine’l-hâzırîn.