Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 311 Hüküm no: 350 Orijinal metin no: [46b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin Kadı Sâlih Efendi’den aldığı kölenin bedelini ödemesi gerektiği Mahmiye-i İstanbul’da Manisalı Çelebi mahallesinde sâkin fahrü’l-kuzât Sâlih Efendi b. el-merhûm Musa Efendi meclis-i şer‘-i hatîr-i lâzımü’t-tevkīrde Mehmed b. İslâm nâm kimesne mahzarında üzerine da‘vâ ve takrîr-i kelâm edip târih-i kitâbdan üç gün mukaddem işbu hâzır bi’l-meclis Mustafa Beşe b. Mehmed nâm dellâl yediyle rıkkıyyetine mu‘terif çatık kaşlı, sarışın, yek-çeşm Rûsiyyü’l-asl Zülfikār b. Abdullah nâm mürâhık abd-i memlûkümü merkūm Mehmed’e yetmiş esedî guruşa bey‘ ve teslîm ol dahi vech-i muharrer üzre iştirâ ve tesellüm ve kabûl etmişidi, hâlâ semeni olan meblağ-ı mezbûru merkūm Mehmed’den taleb ederim suâl olunsun dedikde, gıbbe’s-suâl ve’l-inkâr müdde‘î-i merkūm Sâlih Efendi’den müdde‘âsını mübeyyine beyyine taleb olundukda udûl-i ricâl-i müslimînden olup mahmiye-i mezkûrede Fîruz Ağa mahallesi sükkânından Mustafa Bey b. Abdullah ve Hasan Çelebi b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezkûr Sâlih Efendi târih-i kitâbdan üç gün mukaddem işbu hâzır bi’l-meclis Mustafa Beşe nâm dellâl yediyle rıkkıyyetine mu‘terif çatık kaşlı, sarışın, yek-çeşm Rûsiyyü’l-asl Zülfikār nâm mürâhık abd-i memlûkünü mezbûr Mehmed’e yetmiş esedî guruşa bizim huzûrumuzda bey‘ ve teslîm ol dahi vech-i muharrer üzre iştirâ ve tesellüm ve kabûl eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebince semen-i mezkûr yetmiş esedî guruşu müdde‘î-i mezkûr Sâlih Efendi’ye edâ ve teslîme merkūm Mehmed’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Sufi Mehmed Efendi b. Mustafa, keşfî Mustafa b. Muharrem, Mehmed Çelebi b. Abdullah Kethüdâ-yı muhzırân, Abdi Çelebi b. Hüseyin, Hasan Çelebi b. Ahmed, Mehmed b. Ramazan, Resul Baba b. Rıdvan.