Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 311 Hüküm no: 351 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Suruç’a kışlamaya giderken Kays urbanının baskınına uğrayan İzoli aşiretinin yağma edilen koyunlarının Berazi aşiretinde olduğu ile ilgili davalarında sulh sağlandığı Cerâ indî hâkezâ nemekahû el-abdü’l-fakīru ileyh sübhânehû ve te‘âlâ Ebûbekir b. Mustafa el-Müvellâ hilâfeten bi nâhiyeti Suruç mâ fîh kemâ fîh nemekahû el-fakīru ileyh sübhânehû Hüseyin el-Müvellâ bi ordu-yı asâkiri’l-mansûre -ufiye anhu- Bi’l-fi‘l Diyarbekir eyâletine mutasarrıf olan serdâr-ı zafer-şi‘âr vezîr-i âsaf-nazîr sa‘âdetlü ve mekremetlü İbrahim Paşa -hamâhallâhû ammâ yeşâ’- hazretlerinin huzûr-ı âlîlerinde akd olunan meclis-i şer‘-i refî‘ü’l-erkân’da fahrü’l-muhadderât tâcü’l-mestûrât Haseki Sultan -dâmet ismetühâ- hazretlerinin havâssından Malatya hâssı re‘âyâsından İzoli aşîretinden Budak Kethüdâ b. Cafer ve Çil Ahmed b. Süvar ve Ahmed b. Hasan ve Bayezid b. Hasan ve Halil b. Hüseyin ve İsmail b. Nâsır ve Veli b. Mustafa ve Saruhan b. Mehmed ve sâirleri cemm-i gafîr ve cem‘-i kesîr ile meclis-i mezbûrda Suruç nâhiyesinde Berazi aşîretinden Zezvârî oymağından Ali Harid Kethüdâ b. Fâzıl ve diğer Ali Kethüdâ b. Hacı Kethüdâ ve Şirâvi oymağından Abbas Kethüdâ b. Mehmed Reş ve Cum‘a Kethüdâ b. Sofu Ali ve Medliç b. Hamo ve Ohyan oymağından Ömer Kethüdâ b. İbrahim ve Zeydo b. Daz ve Veli b. Huri ve Zeydan oymağından İbrahim Kethüdâ b. Mîr ve Mürşid b. Hacı Vendan ve Peçan oymağından Bekir Kethüdâ b. Bâli ve Mehmed b. Hamo ve Ahmed Kethüdâ b. Dinar ve Cabir b. Mehmed ve Alâaddinli oymağından Hüseyin Bey b. Kenan ve Ali Bey b. Sefkat Bey ve Şeyhan oymağından Şeyh Haydar b. Şeyh Mehmed ve sâirleri ve Dinani aşîreti kethüdâlarından Mahmud Kethüdâ, Bayındır ve Halil Kethüdâ b. Acem Kethüdâ ve sâirleri muvâcehelerinde her biri ferden ferdâ ikrâr ve takrîr-i kelâm edip bundan akdem kat‘-ı tarîk ile mu‘tâd olan Kays urbânı eşkiyâsı biz evlerimiz ile göçüp kışlamağa giderken Suruç nâhiyesi kurbunda göçümüz üzerine gelip evlerimizi vurup bi’l-cümle emvâl ve erzâkımızı nehb ü gāret ettiklerinde biz dahi ahvâlimizi Âsitâne-i sa‘adet-âşiyâna i‘lâm eylediğimizde zikr olunan şakīler nefîr-i âm ve gāret olunan emvâlimizi mallarından bize red ve tazmîn olunmak bâbında kıdvetü’l-emâsil ve’l-akrân Ali Ağa -zîde kadruhû- mübâşeretiyle vezîr-i müşârün-ileyh hazretlerine hitâben yedimize hatt-ı hümâyûn-ı sa‘âdet-makrûn verilip hâlâ Şuruç nâhiyesine dâhil olduğumuzda gāret olunan emvâlimizden Berazi ve Dinani aşîretleri beynlerinde on bin koyunumuz vardır deyû kendilerden da‘vâ eylediğimizde anlar münkir olup biz dahi isbât sadedinde iken beynimize muslihûn tavassut edip mezbûrlar edâsında mu‘terif olduklarından sonra bizi üç bin nakid guruş ve üç bin koyuna ıslâh ettiklerinde biz dahi es-sulhü seyyidü’l-ahkâm fehvâsıyla âmil olup sulh-i mezkûra râzı ve bedel-i sulh olan akçe ve koyundan iki bin üç yüz nakid guruş ve dört yüz koyun Berazi kethüdâları yedlerinden alıp kabz edip yüz koyunu dahi anlara hibe edip husûs-ı mezbûra müte‘allika de‘âvîden biribirimizin zimmetlerin ibrâ-i âmla ibrâ ve iskāt eyledik ba‘de’l-yevm biribirimiz ile husûs-ı mezbûra müte‘allik da‘vâ ve nizâ‘ımız kalmamışdır, eğer bu husûsa müte‘allik tarafeynden da‘vâ sâdır olur ise lede’l-hükkâm mesmû‘ olmayıp tezvîre haml olunsun deyû ikrâr ettiklerinde mezbûrûnun minvâl-i muharrer üzre sudûr bulan ikrârların merkūmûn Berazi ve Dinani kethüdâları vicâhen tasdîk ve tahkīk ettiklerinde mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ilevvel sene seb‘a ve seb‘în ve elf. Şuhûdü’l-hâl: Fahrü’l-emâcid Mustafa Ağa Zâbit-i Suruç, fahrü’l-emâsil İbrahim Ağa b. Abdullah, fahrü’l-fezâil Mürsel Bey Kethüdâ-yı Türkmân, Seyfhan Bey Kethüdâ-yı Türkmân, Muammer Bey b. Bahaeddin, Nâsır Bey b. Hüseyin ez-Za‘îm, Ulaşlı Mehmed Bey ve gayruhüm mine’l-huzzâr.