Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 369 Hüküm no: 388 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı lehdarlarının eski câbi olan Süleyman’ın aldığı borcu hibe etmeleri Havâss-ı Aliyye kazâsı a‘mâlinden kasaba-i Hasköy’de câmi‘-i şerîfi olan Kiremitçi Ahmed Çelebi merhûmun evlâdı evlâdından Abdi Çelebi b. Derviş asâleten ve hemşîresi Kerime Hâtun kıbelinden ikrâr-ı âti’z-zikre vekîl olup mezbûrenin dayısı ma‘rifet-i şer‘iyye ile ârifân olan İmâm Mehmed Efendi b. Mustafa ve Mehmed Bey b. Ebûbekir şehâdetleri ile şer‘an vekâleti sâbite olan dâmâdı Mehmed Çelebi b. Hasan vekâleten ve Aynî Hâtun bt. ( ) tarafından kezâlik ikrâr-ı câ’i’z-zikre vekîl-i şer‘-i müsecceli olan sadrî kebîr oğlu es-Seyyid Mehmed Çelebi b. es-Seyyid Mustafa vekâleten meclis-i şer‘de sâbıkan evkāf-ı mezbûre câbîsi olan bâ‘isü’l-kitâb Ramazan Bey b. Abdülmennân mahzarında her biri ikrâr ve takrîr-i kelâm edip merhûm-ı mezbûr evkāfı gallâtının mesârif-i mu‘ayyeneden fazlası li’z-zekeri mislü hazzi’l-ünseyeyn evlâdına ve evlâd-ı evlâdına şart ve ta‘yîn etmeğin evkāf-ı mezbûre musakkafâtından olup bundan esbak bilâ-veled fevt olan Sâlih Efendizâde merhûmun uhdesinde olan kiremithâne hissesi mahlûl olmağla taraf-ı vakıfdan iki yüz elli bin akçe icâre-i mu‘accele ve ücret-i müeccele ile Süleyman Paşa’ya îcâr ve icâre-i mu‘accele-i mezkûrenin harc ve sarfdan bâkī kalanı şart-ı vâkıf üzre meclis-i şer‘de beyne’l-evlâd tevzî‘ ve taksîm olunmak üzre hesâb ve kitâb olundukda, merkūm Ramazan Bey hîn-i îcârda evkāf-ı mezbûre câbîsi olmağla hizmeti mukābelesinde meblağ-ı mezbûrdan izn-i mütevellî ile sekiz bin fıddî nakd-i râyic-i fi’l-vakt akçe ahz ü kabz etmeğin meblağ-ı mezbûrdan bana ve müvekkiletân-ı mezbûretâna isâbet ve intikāl eden hisse-i mu‘ayyenelerini sâbıkan câbî-i vakf-ı mezbûr olan merkūm Ramazan Bey’e cümle rızâ ve hüsn-i ihtiyârımız ile hibe ve temlîk eyledik mezbûr Ramazan Bey dahi meclis-i hibede ittihâb ve temellük ve kabûl eyledi ba‘de’l-yevm zikr olunan sekiz bin akçeden cümlemize isâbet eden hisselerimiz da‘vâsından mezbûr Ramazan Bey zimmetini ibrâ eyledim deyû mezbûr Abdi Çelebi asâleten ve müvekkilelerimiz dahi ibrâ eyledik dediler deyû vekîlân-ı mezbûrâna müvekkile ikrâr ve i‘tirâf eylediklerinde gıbbe’t-tasdîki’l-mu‘teber mâ hüve’l-vâki‘ kayd şüd. Fî gurreti Muharremi’l-harâm li sene selâse ve seb‘în ve elf. Şuhûdü’l-hâl: Fahrü’l-müderrisîn-i kirâm Receb Efendi, Abdülbâkī Çelebi el-Müezzin, Mustafa Efendi b. Sinan, Kalender Mehmed Çelebi el-Cündî, Mustafa b. İbrahim, Ali Çelebi b. Abdullah, Abdi Beşe b. Şaban, Şaban Bey el-Cündî, Ali Çelebi el-Hallâk ve gayruhüm mine’l-hâzırîn.