Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 370 Hüküm no: 389 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı lehdarlarının gelirinden bir miktar borçlanan mescidin imamı Mehmed Efendi’nin borcunu bağışlamaları Havâss-ı Aliyye kazâsı a‘mâlinden Hasköy’de câmi‘-i şerîfi olan Kiremitçi Ahmed Çelebi merhûmun evlâdı evlâdından Abdi Çelebi b. Derviş asâleten ve hemşîresi Kerime Hâtun kıbelinden ikrâr-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan Ramazan Bey b. Abdullah ve Mehmed Bey b. Ebûbekir şehâdetleriyle şer‘an vekâleti sâbite olan dâmâdı Mehmed Çelebi b. Hasan vekâleten ve Aynî Hâtun bt. ( ) tarafından kezâlik ikrâr-ı câ’i’z-zikre vekîl-i şer‘-i müsecceli olan sadrî kebîr oğlu es-Seyyid Mehmed Çelebi b. es-Seyyid Mustafa vekâleten meclis-i şer‘-i şerîfde sâbıkan evkāf-ı mezbûre kâtibi olup hâlâ câmi‘-i mezbûrda imâm olan bâ‘isü’l-kitâb Mehmed Efendi b. Mustafa mahzarında her biri bi’l-asâle ve bi’l-vekâle ikrâr ve takrîr-i kelâm edip merhûm-ı mezbûr evkāfı gallâtının mesârif-i mu‘ayyeneden fazlasını li’z-zekeri mislü hazzi’l-ünseyeyn evlâdına ve evlâd-ı evlâdına şart ve ta‘yîn etmeğin evkāf-ı mezbûre musakkafâtından olup bundan esbak bilâ-veled fevt olan Sâlih Efendizâde uhdesinde olan kiremithâne hissesi mahlûl olmağla taraf-ı vakıfdan iki yüz elli bin akçe icâre-i mu‘accele ve ücret-i müeccele-i ma‘lûme ile Süleyman Paşa’ya îcâr ve icâre-i mu‘accele-i mezkûrenin harc ve sarfından bâkī kalanını şart-ı vâkıf üzre meclis-i şer‘de beyne’l-evlâd tevzî‘ ve taksîm ve hesâb ve kitâb olundukda, mezbûr Mehmed Efendi hîn-i îcârda evkāf-ı mezbûre kâtibi olmağla hizmeti mukābelesinde meblağ-ı mezbûrdan izn-i mütevellî ile on üç bin fıddî nakd-i râyic fi’l-vakt akçe alıp kabz eyledim deyû cevâb vermeğin zikr olunan on üç bin akçeden bana ve müvekkiletân-ı mezbûretâna isâbet ve intikāl eden hisse-i mu‘ayyenelerini sâbıkan evkāf-ı mezbûre kâtibi olan merkūm Mehmed Efendi’ye cümleten rızâ ve hüsn-i ihtiyârımız ile hibe ve temlîk eyledik mezbûr Mehmed Efendi dahi meclis-i hibede dahi ittihâb ve temellük ve kabûl eyledi ba‘de’l-yevm zikr olunan on üç [bin] akçeden cümlemize isâbet eden hisselerimiz da‘vâsından mezbûr Mehmed Efendi zimmetini ibrâ eyledim deyû mezbûr Abdi Çelebi asâleten ve müvekkilelerimiz dahi ibrâ eylediler deyû vekîlân-ı mezbûrâna vekâleten ikrâr ve i‘tirâf eylediklerinde gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ kayd şüd. Fî gurreti Muharremi’l-harâm sene 1073. Şuhûdü’l-hâl: Fahrü’l-müderrisîn-i kirâm Receb Efendi, Abdülbâkī Çelebi el-Müezzin, Mustafa Efendi b. Sinan, Kalenderî Mehmed Ağa el-Cündî, Mehmed Ağa b. Ahmed Ağa, Mustafa b. İbrahim, Ali Çelebi b. Abdullah, Abdi Bey b. Şaban, Şaban Bey el-Cündî, Ali Çelebi el-Hallâk ve gayruhüm.