Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 372 Hüküm no: 391 Orijinal metin no: [85a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî Hatun bt. Ali’nin Kiremitçi Ahmed Çelebi Vakfı lehdarlarından Aynî Hatun’un mütevellide alacağı kalmadığı Havâss-ı Aliyye kazâsına tâbi‘ Hasköy’de vâki‘ Kiremitçi Ahmed Çelebi merhûmun evlâd-ı evlâdından Aynî Hâtun bt. Ali tarafından her husûsuna vekâlet-i mutlaka ile vekîl-i şer‘-i müsecceli olan sadrî kebîr oğlu hâmilü’l-kitâb es-Seyyid Mehmed Çelebi b. es-Seyyid Mustafa nâm vekîli meclis-i şer‘de yine merhûm-ı mezbûrun evkāfına bi’l-fi‘l mütevellî olan Mehmed Çavuş b. Ebûbekir nâm kimesne mahzarında bi’l-vekâle üzerine takrîr-i da‘vâ edip merhûm-ı mezbûr vakfının gallâtının mesârif-i mu‘ayyeneden fazlası li’z-zekeri mislü hazzi’l-ünseyeyn evlâdına ve evlâd-ı evlâdına şart ve ta‘yîn ve vakfiye-i ma‘mûlün-bihâsında tansîs ve tahrîr etmeğin hâlâ ba‘de külli hesâb hisse-i evlâdına ber mûceb-i şart-ı vâkıf vâlidem müvekkile-i mezbûrenin üç bin beş yüz altmış altı akçesi [zimmetinde kalmışdır dedikde] mütevellî-i mezbûr cevâbında fi’l-vâki‘ hâl minvâl-i muharrer üzre olmuşdur. Zikr olunan üç bin beş yüz altmış altı akçesi müvekkile-i mezbûre Aynî Hâtun’un[dur] benim zimmetimde kalmışdır meblağ-ı mezbûr müvekkile-i mezbûre Aynî Hâtun’a zimmetimde lâzımü’l-edâ ve vâcibü’l-kazâ deynimdir deyû bi tav‘ihî ikrâr etmeğin alâ mûcebi ikrârihî zikr olunan üç bin beş yüz altmış altı akçeyi müvekkile-i mezbûre Aynî Hâtun’a edâ ve teslîm ile mütevellî-i mezbûr ilzâm olunup mâ hüve’l-vâki‘ bi’t-taleb kayd şüd. Fi’l-yevmi’r-râbi‘ min Muharremi’l-harâm sene 1073. Şuhûdü’l-hâl: Mehmed Efendi el-İmâm, fahrü’l-müderrisîni’l-kirâm Receb Efendi, Mustafa Ağa b. Sinan, Abdülbâkī Çelebi el-Müezzin, Ali Çelebi el-Hallâk, Mehmed Beşe b. Musli, Hüseyin Muhzır, Mehmed b. Mahmud, diğer Hüseyin ve gayruhüm mine’l-hâzırîn. [85a-3]