Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 313 Hüküm no: 352 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Berazi aşiretinin aynı davada İzoli aşiretiyle anlaştıkları Yu‘melu bi mazmûnihî harrerehû el-fakīru ileyh sübhânehû Abdülcelil el-Kadı bi medîneti [Bîretü’l-fırad] el-mahmiyye -ufiye anh- El-emru kemâ rukime fîh nemekahû el-abdü’l-fakīru ileyh sübhânehû Ebûbekir b. Mustafa el-Müvellâ hilâfeten bi nâhiyeti Suruç -ufiye anh- Bi’l-fi‘l Diyarbekir eyâletine mutasarrıf olan serdâr-ı zafer-şi‘âr vezîr-i rûşen-zamîr sa‘âdetlü ve mekremetlü İbrahim Paşa -edâmallâhu te‘âlâ iclâlehû- hazretlerinin huzûr-ı âlîlerinde akd olunan meclis-i şer‘de Bîretü’l-fırad kazâsına tâbi‘ Suruç nâhiyesinde sâkin Berazi aşîretinden Alâaddin oymağından Kenan Bey b. Sefkat Bey ve oğlu Hüseyin Bey ve Zeydan oymağından İbrahim Kethüdâ b. Mîr ve Mehmed b. Mamur ve Peçan oymağından Bekir Kethüdâ b. Bâli ve Dinani aşîretinden Ahmed Kethüdâ b. Mamur ve Süleyman Kethüdâ b. Hamza nâm kimesneler meclis-i mezbûrda fahrü’l-muhadderât tâcü’l-mestûrât Haseki Sultan -dâmet ismetühâ- hazretlerinin havâs re‘âyâsından Malatya hâssına tâbi‘ İzoli aşîretinden Budak Kethüdâ b. Cafer ve Çil Ahmed b. Süvar ve Ahmed b. Hasan ve Bayezid b. Hasan ve Halil b. Hasan ve İsmail b. Nâsır ve Veli b. Mustafa ve Saruhan b. Mehmed mahzarlarında her biri ikrâr ve takrîr-i kelâm edip bundan akdem Kays urbânı eşkiyâsı mezbûrların evlerin basıp bi’l-cümle emvâl ve erzâkları gāret ettiklerinde mezbûrlar Âsitâne-i sa‘âdete varıp ahvâllerin i‘lâm ve tâife-i mezbûre nefîr-i âm olunup mallarından zikr olunan re‘âyânın malları edâ olunmak bâbında kıdvetü’l-emâsil ve’l-akrân Ali Ağa mübâşeretiyle vezîr-i müşârün-ileyh hazretlerine hitâben hatt-ı hümâyûn-ı sa‘âdet-makrûn vârid olup mukaddemâ sizin beyninizde dahi gāret olunan emvâlimizden koyun ile üç bin guruşa ıslâh olup hüccet-i şer‘iyye olunmuşidi, eğer ba‘de’l-yevm bu husûsa müte‘allik bizlerden ve oymaklarımızdan mukaddemâ verilen hüccet-i şer‘iyye[ye] muhâlif da‘vâ sâdır olur ise pâdişâh-ı âlem-penâh hazretlerine elli bin guruş nezrimiz olsun deyû ikrâr ettiklerinde mezbûrûnun sudûr bulan ikrârların mezbûrûn İzoli Aşîreti bi’l-muvâcehe tasdîk ve kabûl ettiklerinde alâ mâ hüve’l-vâki‘ bi’t-taleb ketb olundu. Tahrîren fi gurreti Rebî‘ilâhir li sene seb‘a ve seb‘în ve elf. Şuhûdü’l-hâl: Fahrü’l-kabâil Mâriş? Bey Kethüdâ-yı Türkmân, Seyfhan Bey Kethüdâ-yı Türkmân, Ulaşlı Mehmed Bey ve Kaya Çavuş Çavûşân-ı dîvân, Ali Çavuş Çavûşân-ı dîvân ve gayruhüm mine’l-huzzâr.