Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 377 Hüküm no: 397 Orijinal metin no: [86a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın miras olarak intikal edip âzat ettiği câriye Gülistan’ın diğer hissedarlara ödeme yapması lazım geldiği [Derkenar:] Müsveddede kalmağın mahalline kayd olunmamışdır. Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Kiremitçi Süleyman Çelebi mahallesinde sâkin iken bundan akdem vefât eden Receb Efendi b. Yusuf nâm müteveffânın verâseti, zevce-i metrûkesi Ayşe bt. Mehmed ile vâlidesi Fâtıma bt. Mustafa nâm hâtuna ve babası mezbûr Yusuf’a ve li ebeveyn karındaşları İbrahim ve Halil nâm kimesnelere münhasıra olup tashîh-i mes’ele-i mîrâsları bi hükmi’l-ferâ’iz on iki sehimden farz i‘tibâr olunup sihâm-ı mezkûreden üç sehmi zevcesi mezbûre Ayşe’ye ve sülüs-i mâ bâkī üç sehmi dahi vâlidesi merkūme Fâtıma’ya ve mâ b[â]kī altı sehmi pederi mezbûr Yusuf’a isâbet ve intikāl eylediği şer‘an zâhir ve müte‘ayyin oldukdan sonra mezbûre Fâtıma meclis-i şer‘de bi tav‘ihâ ikrâr ve i‘tirâf edip mûrisimiz oğlum müteveffâ-yı mezbûr Receb Efendi’nin mülkü olup ba‘de vefâtihî bi’l-irsi’ş-şer‘î bize isâbet ve intikāl eden işbu orta boylu açık kaşlı gök elâ gözlü sarışın Rûsiyyetü’l-asl Gülistan bt. Abdullah nâm câriyeden bâlâda zikr ve tasrîh olunduğu üzre bana âid olan üç sehim hissemi, hasbeten lillâhi te‘âlâ i‘tâk ve tahrîr eyledim deyicek ıtk tahrîri kabûl etmemekle hâkim-i muvakki‘-i sadr-ı kitâb hazretleri kıbelinden câriye-i mevsûfe-i mezkûrenin ıtkına ba‘de’l-hükm sâir veresenin hisselerini si‘âyet lâzım gelmekle câriye-i mezbûrenin kıymeti ehl-i hibre beyninde tahmîn-i sahîh ile tahmîn olundukda, câriye-i mezbûreye seksen kıt‘a riyâlî guruş bahâ takdîr olunup meblağ-ı mezbûrdan yirmi kıt‘a riyâlî guruş mu‘takası mezbûre Fâtıma hissesi için ihrâc mâ‘adâ altmış kıt‘a riyâlî guruş mezbûre Ayşe ile merkūm Yusuf’a si‘âyet ve edâya merkūme Gülistan’a tenbîh birle mâ hüve’l-vâki‘ kayd şüd. Fi’l-yevmi’l-hâmis aşer min şehri Rebî‘ulevvel sene 1072. Şuhûdü’l-hâl: Mahmud Efendi b. Mehmed nâib-i bâb, Fahrü’l-kuzât Mehmed Efendi b. Hâbil, diğer Mehmed Efendi b. Hasan, Sâlih Mehmed Efendi b. Mehmed ve gayruhüm.