Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 380 Hüküm no: 399 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasakçı Ömer Beşe b. Ahmed’in Bedros v. Selnik’e hakaret edip dövdüğü Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- sûkunda papuşî olan bâ‘isü’l-vesîka Bedros v. Selnik nâm Ermeni meclis-i şer‘de medîne-i mezbûrede yasakçı olan Ömer Beşe b. Ahmed nâm râcil mahzarında üzerine takrîr-i da‘vâ edip bundan akdem merkūm Ömer Beşe benden bi gayri hakkın yetmiş akçe almakla mahkeme-i şerîfe gelip meblağ-ı mezbûru da‘vâ ve hükm-i hâkim ile zikr olunan yetmiş akçemi geri aldığım ecilden işbu târih-i kitâb günü kable’z-zuhr mezbûr Ömer Beşe bir yoldaşıyla dükkânım önüne gelip senden ol yetmiş akçeyi alırım bre dînini îmânını falan eylediğim deyû nice türlü şütûm-ı galîza ile şetm eylediğinden mâ‘adâ değnek ile başımı darb ve şec eylemişdir ve yoldaşının hançeriyle beni katl murâd eylemişdir fi’l-vâki‘ eğer yoldaşı hançeri vereydi ve ben dahi firâr etmeyeydim mezbûr Ömer Beşe beni katl etmek mukarrer idi, hâlâ suâl olunup ihkāk-ı hak olunmak matlûbumdur deyicek gıbbe’s-suâl ve’l-inkâr ve akībe’l-istişhâd udûl-i ricâlden Abdurrahman Beşe b. Durmuş ve Mehmed b. Bâli nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-vâki‘ mezbûr Ömer Beşe târih-i mezbûrda ve vakt-i merkūmda yoldaşıyla müdde‘î-i mezbûrun dükkânı önüne gelip müdde‘î-i mezbûra bre dînini îmânını falan eylediğim deyû nice türlü şütûm ile şetm ve değnek ile darb ve başını bizim huzûrumuzda şec eylemişdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mâ cerâ bi’t-taleb ketb olundu. Fi’l-yevmi’s-sâmin mine’l-Muharremi’l-harâm li sene selâse ve seb‘în ve elf. Şuhûdü’l-hâl: Mehmed Bey üstâd-ı Bahçe-i Kâğıdhâne, İbrahim Çelebi el-Attâr, Mehmed Bey b. Hasan el-Attâr, Ali Çelebi b. ( ) el-Attâr, Abdullah el-Müezzin, Mehmed b. Fazlı ve gayruhüm.