Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 384 Hüküm no: 405 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdülmennân’ın Rus kölesi Ahmed’i âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesinde sâkin fahrü’l-akrân Mehmed Ağa b. Abdülmennân tarafından ıtk ve tahrîr-i âti’z-zikri ikrâra vekîl olup Mehmed Çelebi b. Musli ve el-Hâc Ebûbekir b. Hasan şehâdetleriyle şer‘an vekâleti sâbite olan el-Hâc Ahmed Çelebi b. Mehmed nâm vekîl meclis-i şer‘de müvekkili mûmâ-ileyh Mehmed Ağa’ya rıkk-ı sâbıkını mu‘terif orta boylu açık kaşlı gök elâ gözlü alnının üst tarafında alâmet-i cerhi olan sivri burunlu sarışın Rûsiyyü’l-asl bâ‘isü’l-kitâb Ahmed b. Abdullah nâm şâbb-ı emred mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Mehmed Ağa abd-i memlûkü mevsûf-ı mezbûru hasbeten lillâhi’l-azîm ve hereben min ikābihi’l-elîm yevme lâ-yenfa‘u mâlün ve lâ benûn illâ men etallâhe bi kalbin selîm malından ifrâz ve ihrâc ve i‘tâk ve tahrîr edip zümre-i ahrâr-ı asliyyîne idrâc ve ilhâk edip min ba‘d üzerine hakk-ı velâdan gayrı hakkım kalmadı dedi ba‘de’l-yevm mevsûf-ı mezkûr sâir ahrâr-ı asliyyîn gibi hür oldu deyicek hâkim-i muvakki‘-i sadr-ı kitâb kıbelinden sıhhat-i ıtk-ı mezkûra hükm birle mâ hüve’l-vâki‘ bi’t-taleb kayd şüd. Fi’l-yevmi’s-sânî aşer mine’l-Muharremi’l-harâm li sene selâse ve seb‘în ve elf. Şuhûdü’l-hâl: Fahrü’l-eimme eş-Şeyh İlmüddin Efendi b. Süleyman, Mustafa Efendi el-Kadı, Mehmed Çelebi b. Mahmud, Osman Çelebi er-Râcil, Sâlih Mehmed Efendi b. Mehmed, Hüseyin muhzır ve gayruhüm mine’l-hâzırîn.