Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 392 Hüküm no: 412 Orijinal metin no: [89b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaya bt. İsmail’den miras kalan evinin oğulları Mehmed Çelebi ve Eyüb Çelebi’ye kalması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Ali Paşa mahallesi sâkinlerinden olup yine mahalle-i mezbûre mescidinde hâlâ müezzin olan Kahvecizâde Mehmed Çelebi b. Hasan nâm kimesne meclis-i şer‘-i şerîf-i enver ve mahfil-i dîn-i münîf-i münevverde, li ebeveyn karındaşı işbu sâhibü’l-kitâb Eyüb Çelebi b. el-mezbûr Hasan mahzarında bi’t-tav‘ ve’r-rızâ ikrâr ve takrîr-i kelâm edip yine mahalle-i mezbûrede sâkine iken bundan akdem vefât eden vâlidemiz Kaya bt. İsmail nâm hâtunun verâseti, zevci olan babamız mezbûr Hasan ile bana ve karındaşım mezbûr Eyüb Çelebi’ye münhasıra olmağın vâlidemiz müteveffât-ı mezbûrenin emlâkinden olup mahalle-i mezbûrede vâki‘ bir tarafdan Tireli Hatice mülkü ve tarafeyni Rahime Hâtun mülkü ve bir tarafdan dayımız merhûm İbrahim Çelebi veresesi mülkleri ve ba‘zan tarîk-i hâs ile mahdûd olan mecmû‘-ı menzil bi’l-irsi’ş-şer‘î cümlemize isâbet ve intikāl edip lâkin babamız mezbûr hissesini ber mûceb-i defter-i kassâm sâir muhallefâtından alıp kabz edip menzil-i mahdûd-ı mezkûr benim ile birâderim mezbûr Eyüb Çelebi beynimizde kalmışdır el-hâletü hâzihî menzil-i mahdûd-ı mezkûrun nısfı benim ve nısf-ı âharı karındaşım mezbûr Eyüb Çelebi’nin mülk-i mevrûsumuzdur dedikde mukırr-ı mezbûru kelimât-ı meşrûhasında el-mukarru lehü’l-mezbûr vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Zilhicceti’ş-şerîfe li seneti isneteyn ve seb‘în ve elf. Şuhûdü’l-hâl: Receb Çavuş el-Mübâşir, Ali Çelebi b. Hızır, Mehmed Efendi b. İbrahim el-İmâm, Halil Çelebi b. Hüdâverdi, Veli Çelebi b. İsa, Mehmed Çelebi b. Musli, Ali Çelebi el-Yesârî, el-Hâc İvaz Çelebi er-Râcil ve gayruhüm mine’l-hâzırîn.