Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 392 Hüküm no: 413 Orijinal metin no: [89b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hayrünnisâ bt. Ömer’in mirası hususunda kız kardeşi Fâtıma’nın eniştesi Şaban b. Mehmed’in zimmetini ibrâ etmesi ve ölene kadar boşanmama sözü alması Medîne-i Hazret-i Ebâ Eyyûb el-Ensârî -aleyhi rıdvânü’l-Bârî-’de Cebecibaşı mahallesinde sâkine iken bundan akdem vefât eden Hayrunnisâ Hâtun bt. Ömer’in verâseti, zevci Şaban b. Mehmed nâm kimesne ile sadriye sagīre kızı Emetullah nâm sagīre ile li ebeveyn kız karındaşı Fâtıma bt. Ömer nâm hâtuna münhasıra olduğu şer‘an zâhir ve müte‘ayyin oldukdan sonra mezbûre Fâtıma Hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb merkūm Şaban mahzarında ikrâr-ı tâm ve takrîr-i kelâm edip mûrisemiz hemşîrem müteveffât-ı mezbûrenin muhallefâtı alâ mâ farazallâhu te‘âlâ beynimizde ber mûceb-i defter-i kassâm tevzî‘ ve taksîm olunup defter-i kassâmda her birimizin hissesine isâbet eden meblağı tamâm alıp kabz edip birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ımız [ve] mûrisem hemşîrem müteveffât-ı mezbûre muhallefâtından bana isâbet [eden] hisse-i şer‘iyyem da‘vâsından zevci merkūm Şaban’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim deyicek gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’t-tâsi‘ aşer min Zilhicceti’ş-şerîfe li seneti isneteyn ve seb‘în ve elf. Şuhûdü’l-hâl: Hamza Efendi nâib-i recül, Receb Halîfe b. Maden, Ali Beşe b. Emrullah, Mehmed b. Kasım, Muharrem b. Cafer, Dilâver b. Abdullah ve gayruhüm mine’l-hâzırîn.