Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 393 Hüküm no: 414 Orijinal metin no: [89b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye bt. Üveys’in tüm malını ve mehrini kocası kayıkçı Abdullah Beşe b. Mehmed’e hibe etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman mahallesinde sâkine Âsiye bt. Üveys nâm hâtun meclis-i şer‘-i şerîf-i lâzımü’t-teşrîfde, zevci işbu sâhibü’l-kitâb kayıkçı Abdullah Beşe b. Mehmed nâm kimesne mahzarında bi tav‘ihâ ikrâr ve takrîr-i kelâm edip hibe-i âtiyyetü’z-zikrin sudûruna değin silk-i mülk-i sahîhimde münselik olan emlâkimden iki beledî döşek ve çarşafleriyle dört yemeni yorgan ve sekiz aded yemeni yastık ve dört aded ayaklı sahan ve üç tas ve dört tencere ve iki bakraç ve bir yeşil atlas kaftan ve bir sîm çengel kuşak ve iki minder ve iki kıt‘a köhne kaliçe ve bir kırmızı köhne kilim ve iki aded ayaklı sandık ve bir kahverengi bir çuka ferâce ve üç alaca dizlik ve altı aded gömlek ve üç aded zıbınımı ve yine zevcim mezbûrdan zimmetinde olan sekiz yüz akçe mehr-i müeccelimi ve sâir ism-i mâl ıtlâk olunur hırdavatımı zevcim mezbûr Abdullah Beşe’ye cümleten hibe-i sahîha-i şer‘iyye ile hibe ve temlîk ve teslîm eylediğimde ol dahi meclis-i hibede ber minvâl-i muharrer ittihâb ve temellük ve tesellüm ve kabz ve kabûl eyledi ba‘de’l-yevm zikr olunan eşyânın küllîsi zevcim mezbûr Abdullah Beşe’nin mülk-i mevhûbudur, keyfe mâ yeşâ’ ve hasbe mâ yahtâr mutasarrıf olsun benim alâka ve medhalim yokdur dedikde gıbbe’t-tasdîki’ş-şer‘î hâkim-i muvakki‘-i sadr-ı kitâb tûbâ-lehû ve hüsnü me’âb hazretleri kıbelinden sıhhat-i hibe-i mezkûreye ba‘de’l-hükm mezbûr Abdullah Beşe zevcesi mezbûre Âsiye mahzarında takrîr-i kelâm edip ba‘de’l-yevm zevcem mezbûre ile ömrümüz âhir olunca hüsn-i mu‘âşeret edip mezbûreyi tatlîk etmemek üzre ta‘ahhüd eyledim deyicek mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ aşer min Zilhicceti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed b. Şaban, Hasan b. Mehmed, Mehmed Beşe b. Abdullah, Mustafa Beşe b. Abdülkādir, İbrahim b. Veli, Derviş b. Hüseyin, Ahmed b. Mehmed, Mehmed b. Veli, Veli b. Ali, Eyüb Çelebi el-Mukayyid el-Halvetî, Mehmed b. Mahmud ve gayruhüm mine’l-hâzırîn.