Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 395 Hüküm no: 416 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstaniye bt. Kasakti’nin Avasya köyündeki vakfa rehin olan bağını Dimo v. Kir’e sattığı ve vakıf mütevellisinin rehni kaldırdığı Mahmiye-i İstanbul’da Mîrahur çarşısında sâkine İstaniye bt. Kasakti nâm nasrâniye meclis-i şer‘de işbu râfi‘ü’l-vesîka Dimo v. Kir nâm zimmî muvâcehesinde bi tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden Havâss-ı Aliyye kazâsına tâbi‘ Avasya nâm karye sınırı dâhilinde vâki‘ bir tarafdan sâbıkan Tanaş nâm zimmî mülkü olan bağ ve iki tarafdan Kaçavla bağı ve bir tarafdan Osman tarlası ile mahdûd tahmînen iki buçuk dönüm bir kıt‘a mülk bağımı cemî‘ tevâbi‘ ve levâhıkı ve âmme-i menâfi‘ ve merâfıkı ile mersûm Dimo’ya bin beş yüz elli nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan meblağ-ı mezbûr bin beş yüz elli akçeyi bi’t-tamâm ve’l-kemâl müşterî-i mezbûr Dimo yedinden alıp kabz eyledim ba‘de’l-yevm bağ-ı mahdûd-ı mezkûrda vechen mine’l-vücûh sebeben mine’l-esbâb alâka ve medhalim kalmadı müşterî-i mezbûr Dimo’nun mülk-i müşterâsı ve hakk-ı sarîhidir, keyfe mâ yeşâ’ ve hasbemâ yahtâr mutasarrıf olsun dedikde mukırra-i mezbûreyi kelimât-ı meşrûhasında el-mukarru lehü’l-mezbûr vicâhen tasdîk ve şifâhen tahkīk ettikden sonra medîne-i Hazret-i Ebâ Eyyûb el-Ensârî’de vâki‘ merhûm Âsım Ahmed Çelebi evkāfı’na bi’l-fi‘l mütevellî olan Davud Efendi b. Mehmed meclis-i mezbûrda, bundan akdem bağ-ı mahdûd-ı mezkûru bâyi‘-i mezbûr mâl-ı vakf-ı mezbûrdan zimmetinde lâzımü’l-edâ deyni olan on bir kıt‘a tâmmü’l-vezn riyâlî guruş-ı kebîr ve bir rub‘ mukābelesinde benim katımda rehn-i makbûz vaz‘ etmişdi el-hâletü hâzihî kable sudûri hâze’l-bey‘ mezbûr İstaniye mâl-ı vakf-ı mezbûrun asıl ve fer‘ini edâ ve teslîm, ben dahi kabz ve vakf-ı mezbûr için tesellüm ve fekk-i rehin etmişimdir deyicek gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’l-hâmis aşer min Zilhicceti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çelebi b. Veli el-Kâtib, Mehmed Çelebi b. Musli, Mehmed b. Mahmud, Ali Çavuş zâbıta-i medîne-i mezbûre, Hüseyin Beş el-Muhtesib ve gayruhüm mine’l-hâzırîn.