Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 396 Hüküm no: 417 Orijinal metin no: [90a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Hüseyin’in üç adet tarlasının kullanım hakkını timar sahibinin bilgisi dahilinde Toto v. Duka’ya devretmesi Vilâyet-i Rumeli’nden Premedi kazâsına tâbi‘ Şebani nâm karye sükkânından Mustafa Bey b. Hüseyin nâm şâbb-ı emred meclis-i şerî‘at-ı Muhammedî’de işbu hâmilü’s-sifri’ş-şer‘î Toto v. Duka nâm nasrâni muvâcehesinde ikrâr ve takrîr-i kelâm edip tefvîz-i âti’z-zikrin sudûruna değin zabt ve taht-ı tasarrufumda olan arâziden karye-i mezbûre sınırı dâhilinde vâki‘ Dalga demekle ma‘rûf mevzi‘de bir tarafdan Hasan tarlası ve bir tarafdan Angeli tarlası ve tarafeyni tepe ve tarîk-i âm ile mahdûd tahmînen dört keyl tohum istî‘âb ve yine bir tarafdan Hasan tarlası ve bir tarafdan diğer Hasan [b.] Bayram tarlası ve bir tarafdan İstirati tarlası ve bir tarafdan tepe ile mahdûd tahmînen beş keyl tohum [istî‘âb eder] Dimo tarlası demekle meşhûr bir kıt‘a ve yine bir tarafdan Hasan tarlası ve bir tarafdan müşterî-i mezbûr menzili ve bir tarafdan vâdi ve bir tarafdan Hüseyin Bey menzili ile mahdûd tahmînen bir keyl tohum alır bostan yeri demekle ma‘rûf bir kıt‘a ki cem‘an üç kıt‘a tarlaların hakk-ı tasarruflarını ma‘rifet-i sâhib-i arz ile mersûm Toto’ya sekiz bin fıddî nakd-i râyic fi’l-vakt akçe bedel mukābelesinde tefvîz bi’l-ferâğ, ol dahi vech-i muharrer üzre tefevvüz ve kabûl edip bedel-i ferâğ olan mezbûrü’n-na‘t sekiz bin akçeyi tamamen müşterî-i merkūm Toto yedinden alıp kabz edip bâlâda zikr olunan üç kıt‘a tarlaları mahallinde zabt ve tasarrufa tarafımdan mersûm Toto’yu taslît eyledim mârrü’z-zikr üç kıt‘a tarla merkūm Toto’nun dâhil-i taht-ı tasarrufu olmuşdur emsâli tasarrufu gibi mutasarrıf olsun deyicek [90b] gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’l-hâmis aşer min Zilhicceti’l-harâm li seneti isneteyn ve seb‘în ve elf. Şuhûdü’l-hâl: Ahmed Çelebi b. Hüseyin, İbrahim Bey b. Koçi el-Bostânî, Mehmed Bey b. Koçi Bey, Hüseyin b. Yakub ve gayruhüm mine’l-hâzırîn.