Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 396 Hüküm no: 418 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minho v. Roço’nun Ömer Bey b. Ali ve ortağı Mehmed b. Abdullah’tan alacaklı olması Çoban tâifesinden işbu hâmilü’s-sifr Minho v. Roço nâm Bulgarî zimmî mahfil-i kazâda Ömer Bey b. Ali nâm cündî ve şerîki Mehmed b. Abdullah nâm kimesne mahzarında üzerlerine takrîr-i da‘vâ edip bundan akdem merkūmân Ömer Bey ve şerîki Mehmed her bir re’si yüz seksen beşer akçeye olmak üzre yedimden yüz elli iki re’s kurban koyunu iştirâ ve kabz ve semeninden bir mikdârını bana edâ ve teslîm ve ol koyunların dahi bir mikdârını bey‘le istihlâk ve bâkī koyunları hizmetdir deyû bana red murâd eylediklerinde ben dahi kabzdan imtinâ‘ etmekle beynimizde münâza‘ât-ı kesîre cereyân etmişiken beynimize muslihûn tavassut edip her bir koyun yüz altmış beşer akçeye olmak hesâb-ı mezbûr üzre haklaşmağa mezbûrân Ömer Bey ve şerîki Mehmed ile inşâ-i akd-i sulh eylediklerinde ben dahi sulh-i mezbûru kabûl ve hesâb-ı mezbûr üzre mezbûrân Ömer Bey ve şerîki Mehmed zimmetlerinde ba‘de külli hesâbin on bir bin elli akçe hakkım bâkī kalıp taleb eylediğimde teslîmden imtinâ‘ ederler hâlâ suâl olunup alıverilmek matlûbumdur deyicek gıbbe’s-suâl mezbûrân Ömer Bey ve şerîki Mehmed cevâblarında fi’l-hakīka hâl minvâl-i muharrer üzre olmuşdur hesâb-ı mezbûr üzre müdde‘î-i mezbûr Minho’ya ba‘de külli hesâb zimmetimizde lâzımü’l-edâ ve vâcibü’l-kazâ on bir bin elli akçe deynimiz vardır deyû bi tav‘ihimâ ikrâr ve i‘tirâf eylediklerinde alâ mûcebi ikrârihimâ zikr olunan on bir bin elli akçeyi müdde‘î-i mezbûr Minho’ya beş bin beş yüz yirmi beş akçeyi edâ ve teslîm ile mezbûrân Ömer Bey ve şerîki Mehmed ilzâm olunup mâ hüve’l-vâki‘ kayd şüd. Fi’l-yevmi’r-râbi‘ aşer min Zilhicceti’l-harâm li seneti isneteyn ve seb‘în ve elf. Şuhûdü’l-hâl: Osman Çavuş el-Mübâşir, Hasan Bey b. Abdullah el-kasab, Hüseyin Muhzır, Ali Beşe Çukadâr ve gayruhüm mine’l-hâzırîn.